Հայկ Կասպարով. «Կարոտը խեղդում է ինձ». Շատ եմ սիրում ֆուտբոլը, եւ հետեւում եմ եղբորս` Գեւորգ Կասպարովի խաղերին

Երիտասարդ սերնդի  այսօրվա վառ անհատականություններից մեկն էլ,  կարծում եմ, կհամաձայնեք,  որ երգիչ Հայկ Կասպարովն է, ով բազում  անգամներ հանդիսատեսին ներկայացել է իրեն առանձնահատուկ  ոճով  եւ ձայնային տվյալներով: Այս անգամ forums.am-ը  փորձեց կապ հաստատել երգիչ Հայկ Կասպարովի հետ, ով այս պահին ապրում եւ ստեղծագործում է   Գերմանիայում: -Հայկ, ի?նչ նոր ծրագրեր ունեք առաջիկայում, եւ արդյո՞ք  դժվար չէ օտարության մեջ ստեղծագործելը, եւ նոր մտահղացումները  կյանքի  կոչելը: -Բազում նպատակներ կան, որոնք իրականացնելու համար ժամանակ և միջոցներ է հարկավոր է: Ամեն կերպ փորձում եմ դրանք  իրականացնել, և տա Աստված, որ իրագործեմ նպատակներս ու ձգտումներս: Բայց,  ինչ խոսք, շատ դժվար է օտար երկրում` ինձ համար բոլորովին անծանոթ և նոր միջավայրում, դրանք կյանքի կոչելը, մասնավորապես, որ Հայաստանից շատ տարբերվող պահանջների  եմ  բախվում:   Բայց դե, բոլոր  դեպքերում փորձում եմ հարմարվել: Պատկերացրեք,  որքան էլ որ այստեղ պայմանները անհամեմատ լավ են,  միևնույնն է, կարոտը, ժամանակ առ ժամանակ խեղդում է ինձ: Սակայն, ես ինձ  համարում եմ երջանիկ, քանի որ ունեմ լավ ընտանիք, լավ ծնողներ, քիչ, բայց լավ  ընկերներ. ամեն մեկին ինձ մոտ չեմ թողնում: Եվ ամենակարևորը. ունեմ  նվիրված կին, ով միշտ իմ կողքին է:

Հաջորդ   տարի    կայցելեմ   Հայաստան  

-Հայկ, իսկ ավելի կոնկրետ, ի՞նչ նորություններ ունեք  ստեղծագործական կյանքում: Եվ արդյո?ք  կա նպատակ`Հայաստան այցելելու: -Ստեղծագործական կյանքում  դեռեւս  նորություններ չունեմ, բայց պլանավորում եմ հաջորդ տարի ունենալ նոր երգ և տեսահոլովակ, իսկ թե ինչ լեզվով կներկայացնեմ երգը`դեռ պարզ չէ: Ինչ վերաբերում է Հայաստան այցելելուն, ապա մեծ ցանկության դեպքում  չեմ կարող դա անել, քանի որ  լեզվի դասընթացների եմ մասնակցում, ինչն ինձ համար շատ կարեւոր է:  Բայց եւ այնպես, հաջորդ տարի, մտադիր եմ  անպայման այցելել Հայաստան: -Հայկ,  արդյո̉ք հայ երիտասարդ երգիչը Հայաստանում ապագա ունի: -Ճիշտն ասած մի քիչ դժվարանում եմ պատասխանել այդ հարցին, բայց, միեւնույն ժամանակ  կարող եմ ասել, որ ամեն մարդ էլ ունի հնարավորություն հաջողության հասնելու: Պարզապես հարկավոր է այն պահպանել, և ավելի ու ավելի առաջ գնալ, բայց մեր մոտ մաքսիմումը`  հարսանիքներին, ու  նմանատիպ միջոցառումներին երգելն է, ինչն էլ խորապես ցավալի է ինձ համար: -Ունե՞ք այնպիսի մի հոբբի, որի մասին կցանկանայիք խոսել: -Շատ եմ սիրում ֆուտբոլ խաղալ, և հատկապես այն դիտել մարզադաշտում, հետևում եմ հարազատ եղբորս` Գևորգ Կասպարովի, բոլոր խաղերին, և շատ հպարտ եմ, որ նա ոչ  միայն լավ ֆուտբոլիստ է, այլև հոյակապ մարդ, ումից փորձում եմ օրինակ վերցնել տարատեսակ հարցերում:

Այս  դարում այդքան բարի պետք չի լինել

-Կյանքում,  ո՞ր արժեքներն են կարևոր   Հայկ Կասպարովի համար, և Ձեր  բնավորության մեջ, ո?ր  գիծն է, որ քննադատվում է հենց  Ձեր իսկ  կողմից: -Շատ եմ կարևորում անկեծությունը և հավատարմությունը, որպես այդպիսին քննադատվող բնավորության գիծ կարող եմ նշել բարիությունս, ինչու հենց քննադատվող, որովհետև կարծում եմ այս դարում այդքան բարի պետք չի լինել:

Եվ իրոք, գտնվելով օտարության մեջ, այդքան էլ հեշտ չէ երիտասարդ երգչի համար կյանքի կոչել այն բոլոր նպատակները, որոնցով նա ապրում,  և փորձում է առաջ գնալ: Forums.am-ը Հայկ Կասպարովին  մաղթում է նորանոր հաջողություններ  ու թռիչքներ թե' ստեղծագործական եւ  թե'  անձնական կյանքում:

Զրույցը` Դիանա   Կարապետյանի