Արման Նշանյան. «Տիեզերքը դու ես». Երբ առաջին անգամ գնացի Տաթեւ, այնպիսի մի էներգետիկ դաշտ զգացի, որն ինձ կարծես ապաքինեց...

Ներաշխարհը`մարդու ամբողջ էության մարմնավորումն է, այն բացահայտում է մարդկային տեսակի խորությունը:  Հետաքրքիր կլինի բացահայտել մի այնպիսի անձնավորության ներաշխարհը, ով իր մարդկային տեսակով  տարբերվում է մյուսներից... Արման Նշանյանի մոտ  դեռ մանկուց ի հայտ եկած դերասանական տաղանդի մասին նշվել է բազմիցս: Մենք էլ  մեր հերթին փորձեցինք ավելի մոտիկից ծանոթանալ  նրա յուրօրինակ աշխարհի հետ: Եվ այսպես, Forums.am-ի այսօրվա   զրուցակիցը  դերասան և օպերային երգիչ Արման Նշանյանն է:  

-Արման, ասում են` արվեստը չի արտացոլվում  արտաքին աշխարհում, այն  մարմնավորվում է արվեստի  մարդու  ներաշխարհում… - Թե ինչպիսին  է իմ ներաշխարհը,  այլոք  ավելի լավ կբացատրեն, բայց ամենայն  հոգևորը գեղեցկացնում է իմ ներաշխարհը: Առհասարակ որևիցե բան, որը  զգացնել է տալիս իմ գոյության մասին   նույնպես գեղեցկացնում է ներաշխարհս. անգամ ցավը, անգամ վիշտը: Երբեմն տանից չեմ ցանկանում դուրս գալ, սակայն զանգահարում եմ դաշնակահարին, ում հետ հանդիպում եմ կոնսերվատորիայում և սկսում եմ երգել. այնպիսի մեղեդային գույներ, որ դուրս են հորդում ինձանից այդ մեկ ժամվա ընթացքում զարմանալի երանգներ և խորություն են ստանում…

Բեմն    ինձ   համար   խորան  է...  

  -Հաճախ արտաքին աշխարհով ոգեշնչված մարդիկ չեն էլ խորանում, թե ինչպիսին է մարդու ներաշխարհը: Կոնկրետ  Ձեր  դեպքում, ինչ եք կարծում արդյո՞ք  շատերը գիտեն, թե ինչպիսին է Արման Նշանյանի ներաշխարհը: -Իմ հանդիսատեսը  կարող է հասկանալ իմ ներաշխարհը, որովհետև ես միայն բեմի վրա եմ լիովին անկեղծ, քանզի բեմն ինձ համար խորան է, ես բեմում նույն զգացողությունն եմ ունենում է, որն ունենում եմ  եկեղեցում:  Այսպիսով ինձ համար արվեստը հոգևորի առկայությունն է, հակառակ դեպքում այն ընդհամենը արհեստ է: - Արման, հաճախ Դուք անրադառնում եք տիեզերքի գոյությանը: -Տիեզերքը ես եմ, տիզերքը դու ես, տիեզերքը այն է, ինչ առկա է քո ենթագիտակցության մեջ, ինչ պարունակում ես դու, ամբողջ տիեզերքը տեղավորվում է քո մեջ, նույնն էլ իմ մեջ: - Ասում են`մարդն իր ծնված օրվանից  մինչև իր ապրած վերջին օրը ինքնաճանաչման  փուլի մեջ է   գտնվում:  Դուք այսօր   ո՞ր փուլում եք, ինչքանո?վ եք հասցրել ինքներդ  Ձեզ ճանաչել: -Ես գտնվում եմ բոլոր փուլերում միաժամանակ, ես չեմ հավատում մի առանձին փուլի, մի ենթաշերտի,քանի որ մենք մշտապես տասնյակ փուլերի մեջ ենք: -Հայաստանում Ձեզ համար կա՞ այնպիսի մի  սիրված վայր , որտեղ սիրում եք առանձնանալ: -Այո ունեմ.  Տաթևի վանքն է, երբ առաջին անգամ գնացի Տաթև,  այնպիսի մի էներգետիկ դաշտ զգացի, որն ինձ կարծես ապաքինեց: Ես ճանապարհ եմ բռնում դեպի Տաթև, երբ  վանքում մարդկանց ներկայությունը այնքան էլ զգալի չէ: Ի դեպ  Տաթևում ամեն օր պատարագ է:

Հենց  մենակ եմ մնում, վերցնում եմ հայելին   ու  ինձ   եմ    նայում     

- Արման, լինելով ոչ միայն կայացած մարդ, այլև երգիչ, դերասան, ի՞նչ սկզբունքներով եք առաջնորդվում կյանքում առհասարակ: - Հավատքով առ Աստված. սիրով եմ  առաջնորդվել, չեմ դավաճանում ներքին ձայնիս, եթե երբեմն էլ քիչ շեղվում եմ, ապա անպատճառ հեռվում տեսնում եմ ետ դարձի ճանապարհը: Եվ ետ եմ դառնում: -Արման, լինում են չէ կյանքում այնպիսի իրադարձություններ, որոնք կտրուկ փոխում են մարդու կյանքը, կհիշե՞ք այդպիսի մի իրադաձություն, որը փոխեց  Ձեզ: -Հիշում եմ` թատերական ինստիտուտ էի ընդունվում, և  ես պետք է փոքր էտյուդ ներկայացնեի. իբր մի աղջիկ իմ ընկերուհին էր, եւ ես  պետք է նրան ամուսնության առաջարկություն անեի, սակայն նա ինձ մերժում է և հեռանում: Եվ երբ նա հեռացավ, ես ինձանից անկախ հուզվեցի ու ամաչեցի: Ընդունելության ժամանակ ինձ ասացին. «Արման, դու իրական դերասան ես, որովհետև չես խաղում, այլ ապրում ես»... Այդ զարմանալի դեպքից հետո  ես իրապես հասկացա, որ բեմը իմն է, իմ կյանքը: -Ինչի՞ց եք ամենից շատ խուսափում: - Քննադատությունից: Երբ ինքս ինձ եմ քննադատում, և երբ ուրիշներն են ինձ քննադատում: Այսինքն խուսափում եմ սեփական սխալիցս, բայց պայքարում եմ ու հենց մենակ եմ մնում,  վերցնում եմ հայելին ու նայում եմ ինձ: -Արման, Ինչպե՞ս եք վերաբերվում Ձեր ստեղծած պատրանքներին: -Հաճախ պատրանքը այնքան նուրբ է, որ չեմ էլ զգում, որ նրա մեջ եմ, բայց ես ամեն օր պայքարում եմ, որպեսզի հրաժարվեմ իմ բոլոր պատարանքներից. այն երազի նման մի բան է, հենց քնում եմ, տրվում եմ պատրանքներիս, սակայն արթանալուն պես հրաժարվում եմ նրանից: Ամենամեծ պատրանքը` գիտակցությունն է, ու երբ որ հրաժարվում եմ ինքս ինձ համար այն ստեղծելուց, մնում եմ այնպիսին ,ինչպիսին, որ կամ.  հաղթում եմ պատրանքներիս: - Ո՞վ չի կարող լինել Ձեր կողքին: - Այն մարդն, ով չի ընդունում, ավելին` հերքում է Աստծուն, ով չարացել և շեղվել է իր ճիշտ  ճանապարհից: Ես այն մարդկանցից չեմ, որ դատապարտեմ նրանց, բայց փորձում եմ հեռու մնալ նման  մարդկանցից: - Արման, վստահ եմ Դուք բազում ուղևորություններ եք ունեցել, կհիշե՞ք Ձեզ համար տպավորված դեպքերից   մեկի մասին: -Երբ առաջին անգամ մեկնեցի Վիեննա, օպերային դասընթացներում ուսանելու, թողեցի ընտանիքս, ընկերներիս, տունս, միջավայրս: Հետաքրքիրն այն էր, որ  մեկ օրում այդ որշումը կայացրեցի, ես մենակ էի այդ քաղաքում, լեզու չգիտեի, բայց տեսա աշխարհը ու շատ բան սովորեցի. Վիեննան իրապես ինձ համար առանձնահատուկ դպրոց էր:

Ով կարող է դառնալ դերասան

-Ի՞նչ է դերասանական հմտությունը, ո՞վ կարող է դառնալ դերասան: -Այն մարդն, ով չունի զգացմունքային, մտովի և հոգևոր սահմաններ... -Արման, եթե  դեմ չեք խոսենք նաեւ Ձեր  հետագա   անելիքների մասին: -Նոր ներկայացում եմ բեմադրում`Սոս Ջանիբեկյանի հետ համատեղ, կատագերգություն է` Նիլ Սայմոնի «Կենտ զույգը» ստեղծագործությունը, որը կյանքի կկոչվի նոյեմբերի սկզբին, Երևանի  դրամատիկական թատրոնում:

Forums.am-ը Արման Նշանյանին մաղթում է  նորանոր հաջողություններ,   ստեղծագործական  թռիչքներ,  ու մեծ  բեմեր, որը նրա համար նաեւ խորան է...

Զրույցը` Դիանա ԿԱՐԱՊԵՏՅԱՆԻ