«Այնպիսի տպավորություն է, որ այդ նախարարությունում մարդիկ են նստած, ովքեր ապրում են Մարս կամ Վեներա մոլորակների վրա.ինչ-որ մարդիկ կատալիզատորների բիզնեսն են ուզում առաջ տանել»

Շրջակա միջավայրի նախարարությունը հանրային քննարկման է ներկայացրել վարչական իրավախախտումների վերաբերյալ օրենսգրքում փոփոխություններ կատարել և տուգանել այն վարորդներին, որոնք առանց կատալիտիկ չեզոքացուցիչների (կատալիզատոր) կամ անսարք չեզոքացման համակարգով մեքենա կվարեն:

Նախագծով առաջարկվում է քաղաքացիներին տուգանել 300,000 դրամով, իսկ պաշտոնատար անձանց՝ 500,000 դրամով։ Գերատեսչությունը տուգանքի չափը սահմանել է՝ հաշվի առնելով ապամոնտաժված կատալիտիկ չեզոքացուցիչների շուկայական միջին գինը` մոտ 300,000 դրամը։

Այս նախաձեռնությունը առաջացրել է քաղաքացիների վրդովվմունքը, որ ստեղծված իրավիճակում, երբ ՀՀ քաղաքացին առանց այն էլ տուժում է բոլոր ոլորտներում՝ աշխարհ ներթափանցած Կորոնավիրուսի հասցրած վնասների հետեւանքով, կառավարությունը չգիտես ինչ երկրորդական նախագծեր է փորձում առաջ քաշել:

Վերոնշյալի շուրջ, NEWSMEDIA.am-ի հետ զրույցում իր վրդովմունքը հայտնեց նաեւ հայտնի քաղաղական վերլուծաբան ԳԱԳԻԿ ՀԱՄԲԱՐՅԱՆԸ, ընդգծելով.

-Նախաձեռնությունը վատը չէ, բայց որքանո՞վ է տեղին այս ճգնաժամային իրավիճակում, երբ երկիրը գտնվում է ֆորսմաժորային վիճակում, եւ ոչ ոք չգիտի թե վաղը կամ մյուս օրը ինչ կլինի: Եւ ահա, գործող իշխանությունները բանուգործը թողած՝ ընկել կատալիզատորների հարց են լուծում: Սա աբսուրդ է, թեեւ պարոն Փաշինյանի իշխանության գալուց հետո, բազմաթիվ նմանատիպ աբսուրդներ կան. դրա համար անկեղծ ասած՝ չենք էլ զարմանում: Այնպիսի տպավորություն է, որ այդ նախարարությունում մարդիկ են նստած, ովքեր ապրում են Մարս կամ Վեներա մոլորակների վրա:

Քաղաքագետը չբացառեց նաեւ.

-Չի բացառվում, որ այս իշխանության ներկայացուցիչներից մեկը, կամ էլ նրանց հետ սերտաճած մեկը՝ մեծ քանակությամբ կատալիզատորներ է ներմուծել, կամ փորձում է ներմուծել, ինչը փորձում են օրենքով վաճառել քաղաքացիների վրա: Սա է հուշում տարրական տրամաբանությունը: Իմ կարծիքով, սա վաղուց էր ծրագրված. ինչ-որ մարդիկ կատալիզատորների բիզնեսն են ուզում առաջ տանել, իսկ ամենահարմարը՝ դա օրենքի ուժով մարդկանց պարտադրելն է: Շատ պրիմիտիվ քայլ է: Ի դեպ պետք է նշեմ, որ Փաշինյանի թիմակիցները այս քայլերը ժառանգել են նախորդ իշխանությունների գործելաոճից: Ինչը անընդունելի է. հատկապես, երբ երկիրդ գտնվում է ծանր, ճգնաժամային իրավիճակում:

Պատրաստեց՝Ն.ԱԴԱՄՅԱՆԸ 

NewsMedia.am

Լուրեր  Հայաստանից եւ աշխարհից