«Պետք է ամեն ինչ լինի օրենքի եւ բարոյականության մթնոլորտում. թող լինի մրցակցություն, թեժ պայքար, բայց ոչ թշնամանք».Դավիթ Բաբայան

Հայտնի է, որ մարտի 31-ին Արցախի հանրապետությունում տեղի են ունենալու նախագահական և Ազգային ժողովի համապետական ընտրություններ: Փետրվարի 26-ից արդեն իսկ մեկնարկել է նախընտրական քարոզարշավը: Արցախի նախագահի թեկնածության հայտ են ներկայացրել տասնչորս թեկնածուներ, որոնցից մեկն է արցախահայությանը հայտնի , պատմական գիտությունների դոկտոր Դավիթ Բաբայանը:

Արցախում տիրող նախընտրական անցուդարձի, ֆավորիտ թեկնածունների եւ սահմանային իրավիճակի շուրջ էլ ծավալվեց Newsmedia.am-ի զրույցը Արցախի նախագահի թեկնածու ԴԱՎԻԹ ԲԱԲԱՅԱՆԻ հետ, ով անդրադառնալով ներքաղաքական իրավիճակին նախ նկատեց.

-Արցախում, այս պահի դրությամբ դեռեւս որեւէ լարվածություն չկա.յուրաքանչյուրն իր քարոզարշավն է իրականացնում: Կան թեկնածուներ, որոնք առհասարակ քարոզարշավ չեն իրականացնում. գեթ մեկ հանդիպում էլ չեն ունեցել: Այդպիսի մարդիկ էլ կան: Մենք օրինակ,  ակտիվ կերպով իրականցնում ենք մեր քարոզարշավը, եւ որեւէ լարվածություն այս պահի դրությամբ դեռեւս չկա:

-Պարոն Բաբայան, դուք այսպես թե այնպես  Արցախում (եւ ոչ միայն Արցախում)ունեք մեծ հարգանք եւ հեղինակություն: Եւ  այս երկար ու ձիգ տարիների ընթացքում,  որպես քաղաքական գործիչ՝  մեծ ավանդ եք ունեցել  Արցախի պետականաշինության գործում: Ինչպե՞ս ստացվեց, որ որոշեցիք այս ընտրություններում առաջադրել Ձեր թեկնածությունը:

-Ինչպես գիտեք, ես արդեն 22 տարի է քաղաքականության մեջ եմ, իսկ վերջին 20 տարին եղել եմ նաեւ հրապարակային դաշտում: Մենք համախոհներով ստեղծել ենք քաղաքական ուժ, եւ բնական է մեր մասնակցությունը Արցախի ընտրություններին: Մենք որեւէ մեկի թշնամին չենք, ոչ էլ որեւէ մեկի կցորդն ենք: Մենք տեսել ենք. այդպիսի մի քանի ուժեր կան, որոնք որպես կուսակցություններ ստեղծվել են ընդամենը մի քանի ամիս առաջ:

- Իսկ ի՞նչ կարգախոսով եք առաջնորդվելու քարոզարշավի ընթացքում:

-Մեր նշաբանը հետեւյալն է. «Ավելի լավ Արցախ»: Մենք չունենք ամպագոռգոռ նպատակներ՝ տնտեսական թռիչքներ եւ նմանատիպ այլ խոստումներ: Մենք ունենք շատ համեստ կարգախոս:

-Նկատենք, որ նախընտրական այս գործընթացների համատեքստում, անընդհատ խոսակցություններ են պտտվում այն մասին , որ ՀՀ իշխանությունները այնուամենայնիվ խառնվում են Արցախի ներքաղաքական գործերին: Ի՞նչ եք կարծում, իրականում այդպես է՞…

-Ես չեմ տեսնում նման բան, որ ՀՀ-ից որեւէ խառնվելու փորձ է իրականացվում. համենայնդեպս, առնվազն այս պահին նման բան չեմ տեսնում:

-Բայց որոշները   հայտարարում են, որ իրենք են ՀՀ-ի նախընտրելի թեկնածունները:

-Գուցե այդ թեկնածուները փիառ են ուզում անել, որպեսզի ցույց տան, որ իրենք ավելի լայն համախոհների շրջանակ ունեն եւ այլն:

-Պարոն Բաբայան, նախըտրական զարգացումները, որոնք կարող են հղի լինել ամենատարբեր զարգացումներով, ինչպե՞ս կարող են ազդել սահմանային իրավիճակի վրա:

-Շատ լավ հարց էր.մենք պետք է ամեն ինչ անենք, որպեսզի չթշնամանանք: Այս գաղափարը մենք բարձրաձայնում ենք ամենուր. մենք մրցակիցներ ենք, բայց ոչ թշնամիներ: Պետք է այնպես անենք, որ եթե Աստված մի արասցե խրամատում հայտնվենք՝ պարզ ճակատով եւ միահամուռ ուժերով պաշտպանենք մեր հայրենիքը: Պետք է ամեն ինչ լինի օրենքի եւ բարոյականության մթնոլորտում, թող լինի մրցակցություն. թեժ պայքար, բայց ոչ թշնամանք:

NewsMedia.am 

Լուրեր Հայաստանից եւ Աշխարհից