Լրատվամիջոցի, լրագրողի դեպքում գործ ունենք մասնագիտական կյանքի հետ, որը պաշտպանված է ընդհանուր ներխուժումներից.Արա Զոհրաբյան

2019թվականը առանձնացավ խոսքի ազատության նկատմամբ ճնշումներով, կոնկրետ լրատվականներ թիրախավորվեցին առանձին օրենսդիրների կողմից` ականատես եղանք նաեւ այսպես կոչված, սեւերի ու սպիտակների ցանկի: Դրան զուգահեռ, վերջերս մամուլում եղան հրապարակումներ, որ Նոր Հայաստանում ապօրինի կերպով խմբագիրների են գաղտնալսում: Օրինակ, «Ժողովուրդ» օրաթերթի խմբագրին, NewsMedia.am լրատվական գործակալության տնօրենին, որի մասին կոնկրետ մարդիկ հայտարարեցին: Ի վերջո կարո՞ղ են արդյոք ապօրինի կերպով գաղտնալսել լրատվամիջոցին, լրատվամիջոցի ղեկավարին` հարցի պատասխանը «Իրավունք TV»-ի տաղավարում փորձեցինք ստանալ Հայաստանի հանրապետության Փաստաբանների պալատի նախագահ ԱՐԱ ԶՈՀՐԱԲՅԱՆԻՑ, ով նկատեց.

-Ձեր հարցը իր մեջ արդեն պատասխան է պարունակում` իհարկե չի կարելի: Հակառակը, կարող նույնիսկ դատարանի որոշմամբ լրատվական գործակալության ներկայացուցիչներին գաղտնալսեն, բայց հետագայում պարզվի, որ դա հիմնավորված չէր: Այսինքն այս դեպքում էլ կարող է խնդիր առաջանալ, որովհետեւ ես կարծում եմ ամեն անհարկի պատճառով չպետք է ներխուժել մարդու մասնավոր կյանք: Ընդ որում` լրատվամիջոցի, լրագրողի դեպքում մենք արդեն գործ ունենք մասնագիտական կյանքի հետ, որը պաշտպանված է ընդհանուր ներխուժումներից: Եվ այս առումով նույնիսկ դատարանի որոշման առկայության պայմաններում պետք է ստուգվի, թե ինչ հանրային շահի բավարարման կամ պաշտպանվածության համար է նախաքննության մարմինը ներխուժել այդ դաշտ: Իսկ առանց դատարանի որոշման գաղտնալսել հեռախոսային խոսակցությունները` ուղղակի անթույլատրելի է եւ եթե նման դեպք կա, ապա մենք գործ ունենք հանցագործության հետ:

Փաստաբանների պալատի նախագահի հետ զրույցի առավել ուշագրավ հատվածները դիտեք «Իրավունք TV»-ի եթերում ավելի ուշ:

ԻԼՈՆԱ ԱԶԱՐՅԱՆ