Ինչո՞ւ է վարչապետը՝ ԱԱԾ-ի կառույցը փորձում այդչափ անլրջացնել՝ հանձնարարելով վերջինիս ղեկավարին զբաղվել ֆեյք բռնելով. Քաղաքագետ

«Վարչապետի ասածի մեջ ողջունելին այն է, որ իսկապես ֆեյքերի դեմ պայքար գնա:Հանկարծ, ինչպես գյումրեցիներն են ասում՝ թացը չորի հետ չխառնվի, եւ գնա: Չփորձեն հանկարծ ֆեյքերի դեմ պայքարի քողի տակ՝ ճնշել ազատ խոսքն ու միտքը: Որովհետեւ հնարավոր է, որ ֆեյքերի պայքարի քողի տակ սկսեն սահմանափակել գործող այն օգտատերերի ազատ տեսակետը, ովքեր խիստ քննադատության են ենթարկում իշխաություններին: Ինձ անհագստացնող հարցերից մեկն էլ այն է, որ արդյո՞ք պայքարելու են նաեւ իշխանամետ ֆեյքերի դեմ եւս, որովհետեւ իշխանամետ ֆեյքերի թիվը ուղղակի սարսափեցնող է»,- Fnews.am-ի հետ զրույցում  անդրադառնալով ֆեյքերի դեմ պայքարին եւ վարչապետի հանձնարարականին ԱԱԾ պետին, ասաց հայտնի քաղաքագետ, վերլուծաբան ԳԱԳԻԿ ՀԱՄԲԱՐՅԱՆԸ, հավելելով.

-Պետք է պայքարը գնա բոլոր ֆեյքերի դեմ՝ չտարանջատելով իշխանամետ ֆեյքերին: Որովհետեւ հենց իշխանամետ ֆեյքերն են , որ ագրեսիվ հարձակման են ենթարկում այն օգտատերին, ովքեր իրենց կարծիքն են արտահայտում սոցցանցերում:
Երրորդ ամենակարեւոր եւ անհասկանալի խնդիրն այն է, թե ի՞նչ կապ ունի ԱԱԾ-ն ֆեյքերի դեմ պայքարի հետ, երբ խոսքը ներհայաստանյան ֆեյքերի դեմ պայքարի մասին է ընդամենը: ԱԱԾ-ի առաջ բավականին լուրջ խնդիրներ կան, օրինակ պայքար օտարերկրա գործկալների դեմ: Կամ, լավ այդ դեպքում էլ ում է պետք ՀՀ Ոստիկանության կիբեռանվտանգության վարչությունը:
Չեմ կարողանում հասկանալ, թե ինչու է վարչապետը՝ ԱԱԾ-ի կառույցը փորձում այդչափ անլրջացնել՝ հանձնարարելով վերջինիս ղեկավարին զբաղվել ֆեյք բռնելով: