Հայ ժողովուրդը հաղթել է պատերազմում, պետականության կառուցման գործում, իր իշխանությունն իր երկրում հաստատելու գործում. Նիկոլ Փաշինյան

Հայ ժողովուրդը հաղթել է պատերազմում, պետականության կառուցման գործում, իր իշխանությունն իր երկրում հաստատելու գործում, և որևէ մեկը՝ դրսից, թե ներսից, չի կարող և չի համարձակվի այդ հաղթանակը խլել ժողովրդի ձեռքից, և դուք եք այդ հաղթանակի ամենակարևոր պաշտպանները. ՀՀ ՊՆ վարչական համալիրում ՀՀ և արտերկրի ռազմաուսումնական հաստատությունների 2017-2018թթ. ուսումնական տարվա շրջանավարտների ավարտական վկայականների հանձնման հանդիսավոր արարողությանն իր ելույթում հայտարարեց ՀՀ վարչապետ Նիկոլ Փաշինյանը:

«Լինել հայոց բանակի սպա՝ նշանակում է կյանքը նվիրաբերել հայրենիքի պաշտպանությանը և անվտանգության գործին, նշանակում է կյանքը նվիրել հայրենակիցների խաղաղ կյանքի, հանգիստ քնի, հանդարտ ապրելու համար: Բայց ՀՀ ԶՈւ ներկայացուցիչները, սպաները, ուրիշների հանգիստ կյանքը ապահովելով, իրենք, ըստ էության, զոհաբերում են իրենց մայրերի, կանանց, հարազատների հանգիստ կյանքը:

Նրանք շատ հաճախ հանուն հայրենիքի պաշտպանության զոհաբերում են այն ժամանակը, որ պետք է անցկացնեին ընտանիքների, երեխաների հետ, ընկերների միջավայրում: Եվ ուրեմն այս ամենի արդյունքում հարց է ծագում՝ ի՞նչն է մարդուն մղում ստանձնելու այս պատվաբեր ուսադիրները, բարձր կոչումը: Ուզում եմ հավատալ, որ ձեզանից յուրաքանչյուրին դեպի ծառայություն տանում է առաքելության գիտակցումը»,-ասել է վարչապետը:

Նիկոլ Փաշինյանը նշել է, որ վաղը հայոց բանակն այլևս չի լինելու այնպիսին, ինչպիսին էր երեկ: «Որովհետև հայոց բանակը ձեզանից շատերին ունենալու է որպես ծառայող սպա, հրամանատար, մինչդեռ երեկ հայոց բանակը չուներ ձեզ այդպիսի կարգավիճակում:

Հույս ունեմ և համոզված եմ, որ ձեզանից յուրաքանչյուրը գիտակցում է, որ իր ներկայությամբ, գիտակցությամբ, նոր կարգավիճակով ինչ-որ բան փոխելու է բանակում և կարևոր է, որ հստակ հասկանա և գիտակցի՝ ինչն է փոխում բանակում և ինչ ուղղությամբ: Հավատում եմ, որ ձեզանից յուրաքանչյուրը ծառայության է անցնում այն գիտակցությամբ, որ հայրենիքի պաշտպանության և բանակի ապագան կախված է հենց ձեզնից, այդ մեկ սպայից, մեկ մարդուց:

Յուրաքանչյուրը կարող է փոխել շատ բան՝ իր իրավասության սահմաններում, և հույս ունեմ, որ ձեզանից յուրաքանչյուրը ձգտում է կատարյալ ծառայության»,-ասել է Նիկոլ Փաշինյանը :

Լինել հրամանատար՝ նշանակում է լինել պատասխանատու ուրիշների առաջ և ուրիշների համար: «Լինել հրամանատար՝ նշանակում է ունենալ կամք և վճռականություն ամենակարևոր պահին զոհվելու հրամաններ արձակելու: Սա չափազանց ծանր և հզոր պատասխանատվություն է, և այն կարող են կրել իրապես ուժեղ, անկոտրում կամքի տեր մարդիկ: Ձեր հայացքներում տեսնում եմ, որ ունեք այդ կամքը ոչ միայն ծառայելու, այլ հաղթանակ բերելու մեր հայրենիքին: Ձեր աչքերի մեջ տեսնում եմ մեր ապագա հաղթանակները» ասել է վարչապետ :

Վարչապետ Փաշինյանը նշեց, որ հենց այս սպաներն են հաղթանակի ամենակարևոր պաշտպանները: «Ձեզ փառավոր ծառայություն եմ մաղթում ՀՀ Զինված ուժերում, հայոց բանակում, որովհետև մեր նպատակը, մեր ապագան ու մեր այսօրը մեկն է, հայ ժողովուրդը հաղթել է, հաղթել է պատերազմում, պետականության կառուցման գործում, և հայ ժողովուրդը հաղթել է իր իշխանությունն իր երկրում հաստատելու գործում, և որևէ մեկը՝ դրսից, թե ներսից չի կարող և չի համարձակվի այդ հաղթանակը խլել ժողովրդի ձեռքից, և դուք եք այդ հաղթանակի ամենակարևոր պաշտպանները: Եվ ուրեմն կեցցե ՀՀ-ն, կեցցե հայոց բանակը, կեցցե ՀՀ ԶՈՒ-ն և հայոց փառապանծ զինվորներն ու սպաները»: