Նապոլեոն Ազիզյանը՝ Գագիկ Ծառուկյան-Իշխան Զաքարյան քաղաքական զույգի, եւ ԲՀԿ-ի նախանձելի կարգավիճակի մասին.VIDEO

Նախօրեին, «Ծառուկյան Դաշինք» խմբակցության ղեկավար Գագիկ Ծառուկյանի խորհրդարանում հնչեցրած մի քանի հայտարարություններից հետո, պարզ դարձավ, որ քաղաքական նոր աշուն-ձմեռ թատերաշրջանի մեկնարկը այլեւս տրված է:
Իսկ ավելի ստույգ, Գագիկ Ծառուկյանի սեպտեմբերի 11-ի բլից զրույցից հետո, նոր դաշտ բացվեց՝ որոշակի կանխատեսումների անելու 2018թ. ապրիլից հետո Հայաստանի նոր կառավարության կազմի մասին:

Չհաշված, որ ԲՀԿ-ականների շրջանում չեն դադարում ակտիվ խոսակցություններ շրջանառվել այն մասին, որ հաջորդ տարի ձեւավորվելիք կառավարության կազմում երեք փոխվարչապետներից մեկի պորտֆելը տրվելու է ԲՀԿ-ին:
Ըստ էության, սպասվող զարգացումների ֆոնին, ոչ պակաս ուշագրավ մեսիջներ ուղարկեց նաեւ Գագիկ Ծառուկյանը, ով շատ պարզ հասկացրեց, որ խաղը փոխվել է, եւ որ ներկայիս իրողությունները ստիպում են այլ կերպ նայել քաղաքական գործընթացներին:

Ավելին, ԲՀԿ նախագահ Գագիկ Ծառուկյանը. լրագրողների հետ զրույցում հայտարարեց.«Ես կյանքում ոչ մի բան չեմ բացառում, բայց երբ որ լինի, ես ասում եմ՝ կարեւորը իմ խոսքը, խոստումը իմ ժողովրդին ես պահելու եմ, պահպանելու եմ»:

Հարցին՝ եթե Սերժ Սարգսյանը լինի վարչապետը, նա Ձեզ համար վարչապետի ցանկալի թեկնածո՞ւ է, նա ասել է, թե եթե-ներով հարցերին չի պատասխանում. «Երբ ՀՀԿ-ն համապատասխան իր որոշումը կկայացնի, իր թեկնածուին կառաջարկի, այդ ժամանակ կասենք»:
Վարչապետ Կարեն Կարապետյանի մասով էլ, ով ընդդիմադիր Գագիկ Ծառուկյանի ընկերն է, նա չցանկացավ խոսել . «8 ամիս առաջ եմ ձեզ ասել՝ ինքը իմ ընկերն է, ինքը խոսք է տվել, ներկայացրել է ծրագիրը, աշխատում է անել, էսօր ընկերն ընկերոջ մասին կարծիք ասելը կոռեկտ չեմ համարում»,-ասաց Ծառուկյանը:

Հետաքրքիր զուգադիպությամբ,խորհրդարանում վարչապետ Կարեն Կարապետյանի մեկ տարվա աշխատանքային գործունեության մասին չցանկացավ խոսել նաեւ ԱԺ «Ծառուկյան» դաշինք խմբակցության պատգամավոր Նապոլեոն Ազիզյանը, ասելով որ ինքն իր տեսակետն արդեն հայտնել է կառավարության աշխատանքի մասին, եւ որ այլեւս այդ թեմային չի անդրադառնալու:

Ճշտմանը, թե ԲՀԿ-ում կա՞ ճնշում պատգամավորների նկատմամբ, որպեսզի նրանք չխոսեն, եւ կարծիք չհայտնեն ներկա քաղաքական գործընթացների շուրջ, Ազիզյանը կես կատակ, կես լուրջ պատասխանեց, որ.«Այո, կա»:

Իսկ թե ո՞վ է ճնշում Ազիզյանին, պատգամավորը պատասխանեց, որ իրեն ճնշում է «Ծառուկյան» դաշինքի աշխատակից Արեւիկը:

Ազիզյանը, մեզ հետ զրույցում դժգոհեց նաեւ, որ իրենց կուսակցության մասին շատ են անիմաստ բաներ խոսում ու չեղած տեղից թիրախավորում… Բայց եւ իրենց չուզողներին խորհուրդ տվեց, որ նման երազներ չունենան, քանի որ իրենց կուսակցության ներսում արշալույսները խաղաղ են բացվում:

Դիտարկմանը, թե այդ դեպքում ինչու՞ էր մամուլը տեւական ժամանակ գրում «Ծառուկյան» դաշինքում տիրող անախորժ տրամադրությունների, ու մասնավորապես Գագիկ Ծառուկյանի-Իշխան Զաքարյանի լուրջ տարաձայնությունների ու անգամ «ձեռնամարտի» մասին, Ազիզյանը պատասխանեց, որ այդպիսի բան չկա, եւ չի էլ կարող լինել; 

Ի դեպ, «Ծառուկյան» խմբակցության պատգամավոր Իշխան Զաքարյանն ԱԺ 6-րդ գումարման 2-րդ նստաշրջանի առաջին նիստին պատասխանելով լրագրողներից մեկի հարցին, թե արդյո՞ք հարթել է խնդիրները Գագիկ Ծառուկյանի հետ, մի տեսակ անբնական տոնով հայտարարել էր, որ իրենք խնդիրներ չունեն: «Երբեք էլ խնդիրներ չեմ ունեցել»,- ասել էր նա և շտապ հեռացել:

Այս եւ այլ հարցերի շուրջ, Նապոլեոն Ազիզյանի հնչեցրած պատասխանները՝ առաջարկվող տեսանյութում:

Գայանե   Զարգարյան