«Հիմա մարդիկ վախենում են նրանցից, ովքեր ցերեկը գողական են, իսկ գիշերը ոստիկանական».Մանվել Եղիազարյան.VIDEO

Դեռ երեք ամիս առաջ «Ազատամարտիկների Դաշինք»-ի անդամներին զգուշացրել են, որ ձերբակալություններ են սպասվում, եթե նախընտրական փուլում ակտիվություն դրսևորեն:
Այս մասին, այսօր՝ մարտի 24-ին, լրագրողների հետ հանդիպման ժամանակ հայտնեցին դաշինքի անդամները, ովքեր սատարում են «Օհանյան-Րաֆֆի-Օսկանյան» դաշինքին և ռեյտինգային թեկնածուներ ունեն Հայաստանի բոլոր մարզերում:
«Սամվել Բաբայանը թեկնածու չէ, ու նա ամենահարմար թիրախն էր, դրա համար կալանավորեցին Սամվել Բաբայանին: Բաբայանը համագործակցում էր մեր հետ, բայց մեծ ազդեցություն չուներ Դաշինքում: Հանրապետականը պետք է կեղծի ընտրությունները Բաբայանին կալանավորում են, որ ասեն՝ Կուժ քեզ ասեմ, կուլա դու լսիր: Սա զգուշացում է... Այս ամենն արվում է, որ ընտրությունները կեղծելուց հետո, ժողովրդին ոտքի հանող չլինի: Հիմա մարդիկ վախենում են նրանցից, ովքեր ցերեկը գողական են, իսկ գիշերը ոստիկանական»,-նշեց «Արաբո» ջոկատի հրամանատար, «Օհանյան-Րաֆֆի-Օսկանյան» դաշինքի թեկնածու Մանվել Եղիազարյանը:
Հրամանատարի խոսքով՝ ազատամարտիկները չեն լռելու ու շարունակելու են իրենց պայքարը:
Ազատամարտիկ, «Օհանյան-Րաֆֆի-Օսկանյան» դաշինքի թեկնածու Ռազմիկ Պետրոսյանն էլ ընդգծեց, որ Բաբայանը Արցախի հերոս է ու նրան կալանավորելով ուզում են ճնշել ժողովրդի վստահությունը վայելող ազատամարտիկներին:
«Մենք մենակ Աստծուց ենք վախենում»,-Ռազմիկ Պետրոսյանի խոսքը շարունակեց Մանվել Եղիազարյանը:
Ազատամարտիկ Գագիկ Մելքոնյանն էլ ընդգծեց, որ արյուն թափելով երկար հնարավոր չէ իշխանություն պահել.«Զբաղվելով բանակաշինությամբ մենք քաղաքականությունից հեռու մնացինք: Ու արդյունքում տեսանք երկրի կործանումը: Մեր պատերազմի մասնակից տղաների 40-50 տոկոսը թափառում է աշխարհով մեկ: Մենք չենք ուզում այս երկիրը դատարկվի:Թշնամին օրեցօր հզորանում է, իսկ մենք պառակտվում ենք: Ամեն գյուղից 2-3 թեկնածու են դրել: Գյուղը բաժանվել է մասերի: Ժողովրդին թշնամի են սարքել, իրար են կոտորում, ամոթ է...»,-ընդգծեց Մելքոնյանը և հավելեց, որ ազատամարտիկների համբերությունն էլ սահման ունի: