Video Ամուսնու աչքի առաջ պանելն ընկավ կնոջ վրա, միայն մի քանի անգամ նվվոց լսվեց ու վերջ. մանրամասներ . Hraparak.am

Կոտայքի մարզի Լեռնանիստ գյուղի ողջ բնակչությունը ցնցված էր այսօրվա դեպքից: Այցելեցինք գյուղ եւ փորձեցինք մանրամասներ իմանալ դեպքի եւ մահացածների մասին: Փլուզված մթերային խանութը պատկանում է նույն գյուղի բնակիչ Գագիկ Ալոյանին, ով իր ընտանիքով աշխատում էր խանութում: Գյուղացիները մեզ պատմեցին, որ առավոտյան խանութում եղել է մայրը իր որդիների հետ. «Որ ասենք ահավոր ձայն ենք լսել, չէ, էն լսեցինք, ոնց որ տանիքից ձյուն թափվեր ցած, 5 րոպե հետո լացի ու բղավոցի ձայներ էինք լսում, չանցավ 10 րոպե տեսնենք շտապօգնության մենքենաներ են գյուղում, փրկարար ջոկատ, ոստիկանության աշխատակիցներ: Առաջացա, տեսա ինչ, շենքը փլվել է, մարդիկ օգնություն են կանչում: Խանութի շենքը դպրոցին կից է, երկրորդ ժամը ավարտվեց, դպրոցի երեխաներին տուն ուղարկեցին: Ողջ գյուղը իրար էր խառնվել: Շենքի փլվելու պահին խանութի մեջ եղել են Գագիկ Ալոյանի կինը՝ 50-ամյա Արմիդա Ալոյանը իր որդիների հետ, եւս երկու հաճախորդ», -պատմում է զրուցակիս: 

Գյուղում մեզ պատմեցին, որ փլուզման պահին Արմիդան խանութի դրամարկղի մոտ է եղել, չի կարողացել փրկվել, տեղում մահացել է: Մյուս կինը՝ 32-ամյա Անուշը Սարգսյանը, ով 3 երեխաների մայր էր, ամուսնու հետ եկել էր խանութ՝ երեխայի ծննդյան օրվա հետ կապված առեւտուր անելու. «Ես տեսա, որ Անուշը վեշերը բերեց, դրեց մեքենան, ապա նորից մտավ խանութ, էդ պահին խանութը փլվեց, ամուսինը գոռալով վազեց, հսկայական պանելները ոնց կարող էր բարձրացնել անմիջապես ընկել էր կնոջ վրա, միայն մի քանի անգամ Անուշի նվվոցի ձայնը լսվեց ու վերջ: Խանութի տիրոջ տղաներից Սարգիսի ոտքը ու կոնքը ջարդվել էր, պանելը ընկեր էր ոտքի վրա, իսկ մյուս տղուն բարեբախտաբար ոչինչ չէր եղել. ինքն մնացել է պանելի ու սառնարանի արանքում, ինքն իրեն դուրս ա եկել, գնացել հիվանդանոց»,- նշեց 43-ամյա Հասմիկը:

Թե ինչն է եղել փլուզման պատճառը, գյուղացիները դժվարացան ասել, ամեն դեպքում ցավալի է, որ փլուզման հետեւանքով 2-ը մահացան, 2 –ն էլ վնասվածքներով տեղեփոխվեցին Երեւան:

Հիշեցնենք, որ փետրվարի 14-ին, ժամը 10:15-ին ԱԻՆ-ում ահազանգ է ստացվել, որ Կոտայքի մարզի Լեռնանիստ գյուղում՝ մթերային խանութում, տեղի է ունեցել փլուզում: Ըստ նախնական տվյալների` կա երկու զոհ և երկու տուժած:

Նելլի Կարապետյան   Hraparak.am