«Վերնիսաժում» ապրիլի 25-ից հետո դադարել է զբոսաշրջիկների աժիոտաժը

1in.am-ը գրում է. «Վերնիսաժում» ապրիլի 24-ից հետո առևտրի տեմպերը բարձրացել էին, հետո կրկին ընկան»,- «Առաջին լրատվական»-ի հետ զրույցում նշեցին «Վերնիսաժում» առևտուր անող նկարիչները, արծաթագործները՝ հավելելով, որ մեծ թվով զբոսաշրջիկներ առևտուր են արել ապրիլի 25-ին, բայց հետո կրկին վերադարձել են նախկին ցավալի պատկերին. «Ներքին սպառողները գումար չունեն, կենցաղային հոգսերն են հոգում, հաճույքի համար առևտուրը վերջին տեղում է, զբոսաշրջիկների մեծ հոսք չի լինում, լինելու դեպքում էլ նախընտրում են մանր իրեր»,- նշեցին նրանք:

Վարպետ Մելիքը և իր տիկինը «Վերնիսաժում» այդ օրերին վաճառել են Հայաստանի պատկերով նկարներ և Ցեղասպանության 100-ամյակը խորհրդանշող ափսեներ: Ափսեների մեջ պատկերված է նուռ և մասուր, որը խորհրդանշում է այն, որ չնայած 1915-ի Ցեղասպանությանը՝ հայերն արդեն 2015-ում են:

«Վերնիսաժում» գիրք վաճառողները նկատեցին, որ եթե չդիտարկենք վերջին միջոցառումները, ապա ընդհանուր առմամբ զբոսաշրջիկների հոսքը նվազել է: Նրանք դժգոհեցին, որ ամենադժվարն իրենց գործն է, զբոսաշրջիկները շատ լինեն, քիչ լիեն՝ իրենց բախտը չի ժպտա, քանի որ Հայաստանը, Հայաստանի պատմությունը, արվեստը ներկայացնող օտարալեզու գրականության, մեղմ ասած, պակաս կա, լավագույն դեպքում ռուսերեն է, անգլերեն շատ քիչ գրականություն կա:

«Վերնիսաժում» գնումներ կատարող զբոսաշրջիկներն ասացին, որ հետաքրքրված են այստեղի արծաթյա գործերով, հայկական ավանադական այլ իրերով՝ հիմնականում նրանցով, որոնց վրա պատկերված է նուռ, խաչ: