Տեսանյութ.Հայաստանը կմասնակցի ռեստորանային սպորտի աշխարհի առաջնությանը.Iravunk.com

«Ազդակ» մամուլի ակումբում այսօր կայացած ասուլիսի ժամանակ ազդարարվեց ՀՀ-ում ռեստորանային սպորտի ֆեդերացիայի հիմնադրման մասին: Ռեստորանային սպորտի համաշխարային ֆեդերացիայի նախագահ, Իսրայելից ժամանած ԱԼԵՔՍ ՌԱԲԻՆՈՎԻՉԸ նախ նշեց, որ Հայաստանը միացել է Ռեստորանային սպորտի համաշխարհային ֆեդերացիային ավելի ուշ, քան բազմաթիվ այլ երկրներ. «Այս շարքում Հայաստանը թվով 28-րդն է, հուրախություն ինձ` իմ հին ընկեր Հայկ Բորիսիչ Բաբուխանյանը որոշում ընդունեց համաձայնել, որպեսզի ղեկավարի Ռեստորանային սպորտի հայկական ֆեդերացիան: Մենք մեր խմբով եկել ենք Երեւան, որպեսզի արդեն քննարկենք ֆեդերացիայի հետագա զարգացման ընթացքը: Նշեմ, որ մեր ֆեդերացիան արդեն 2,5 տարի է, ինչ գործում է: Առ այսօր անցկացվել են երկու աշխարհի առաջնություն` մեկը` Ռուսաստանում, մյուսը` Իսրայելում: Ունեցել ենք հաղթողներ, որոնք արժանացել են ֆեդերացիայի գեղեցիկ գավաթներին: Այս տարվա տվյալներով` մեր ֆեդերացիան արդեն իսկ տեղ է գտել աշխարհի թոփ 20 ֆեդերացիաների շարքում եւ, օրինակ, այնպիսի ֆեդերացիաներ, ինչպիսիք են կյորլինգը, բադմինտոնը, մնացել են մեր թիկունքի հետեւում»: Ինչ վերաբերում է գալիք տարվա ծրագրերին` Ա. Ռաբինովիչն ասաց, որ Բուլղարիայում մայիսի 15-17-ը տեղի է ունենալու Ռեստորանային սպորտի թվով երրորդ աշխարհի առաջնությունը, որին կմասնակցեն շուրջ 12 երկրներից, որոնց թվում նաեւ կլինի հայկական հավաքականը:

Անդրադառնալով Ռեստորանային սպորտի հայկական ֆեդերացիան ղեկավարելու առաջարկին համաձայնելու իր որոշմանը` ՍԻՄ կուսակցության նախագահ, ԱԺ մի քանի գումարման պատգամավոր ՀԱՅԿ ԲԱԲՈՒԽԱՆՅԱՆԸ նշեց. «Ինձ համար անսպասելի էր իմ վաղեմի ընկերոջ` Ալեքս Ռաբինչովիչի առաջարկը` գլխավորել այս ֆեդերացիան: Բայց հարցը վերաբերում է մեր մշակույթի մի ճյուղին` խոհարարական մշակույթին: Յուրաքանչյուր ազգ ունի իր խոհարարական արվեստը, որով ներկայանում է աշխարհին: Ինչպես գիտեք, վերջերս նույնիսկ մեծ պայքար էր ծավալվել մեր որոշ խոհարարական ճաշատեսակների առումով: Ադրբեջանցիները փորձում էին իրենց վերագրել այդ ճաշատեսակները, թուրքերը` իրենց: Սա այն կարեւոր ոլորտն է, երբ ցանկացած ժողովուրդ կարողանում է ներկայացնել իր մշակութային նվաճումները` խոհարարական արվեստի առումով: Եվ, իհարկե, սա եւս մի հարթակ է, որպեսզի կարողանանք ներկայացնել մեզ, մեր արվեստը եւ դրանով իսկ կարողանանք դուրս գալ միջազգային ասպարեզում մրցակցային հարթակներ»:

Պարզվում է` Ռեստորանային սպորտի հայկական ֆեդերացիան` Հ. Բաբուխանյանի գլխավորությամբ, արդեն իսկ աշխատանքներ է իրականացնում` նախապատրաստվելով գալիք տարի կայանալիք աշխարհի առաջնությանը. «Արդեն իսկ սկսել ենք նախապատրաստական աշխատանքներ` աշխարհի առաջնությանը մասնակցելու համար: Եթե մայիսին պետք է մեր հայկական թիմը մասնակցի աշխարհի առաջնությանն, ապա մենք պետք է սկսենք մրցումներ մեր երկրում եւ կարողանանք ընտրողական մի համակարգ ձեւավորել, որպեսզի մեր հանրապետության ոլորտի լավագույնները մասնակցեն այս առաջնությանը: Սրանով նաեւ մեզ կհաջողվի ոգեւորել մեր ռեստորատորներին եւ նրանց նախապատրաստել համաշխարհային այս մեծ միջոցառմանը»:

Ռեստորանային սպորտի Եվրասիական ֆեդերացիայի փոխնախագահ, մեր հայրենակից ՍԻՄԱԿ ՍԱՀԱԿՅԱՆԸ շնորհավորեց` Ա. Ռաբինովիչին` հայկական ֆեդերացիայի նախագահ ճիշտ անձի վստահելու համար. «Առաջին դեմքից շատ բան է կախված: Ուրախ եմ, որ ֆեդերացիայի նախագահ ընտրվեց մեր հարգարժան ընկերը` Հայկ Բորիսիչը: Եվ պատահական չէ, որ հայկական ֆեդերացիայի փոխնախագահը Հայաստանի թիվ մեկ խոհարարն է` պարոն Մամուլյանը: Լիահույս եմ, որ մեր հանրապետությունը լավ կներկայանա առաջիկա աշխարհի առաջնությանը եւ կգրավի առաջին տեղը»:

Ռեստորանային սպորտի հայկական ֆեդերացիայի փոխնախագահ ՍԵԴՐԱԿ ՄԱՄՈՒԼՅԱՆԸ` եւս շնորհակալություն հայտնեց Ա. Ռաբինովիչին, որ Հայաստանը միացավ Ռեստորանային սպորտի համաշխարային ֆեդերացիային. «Յուրաքանչյուր հնարավորություն մենք պարտավոր ենք օգտագործել` մեր ազգային խոհանոցը ներկայացնելու համար, որովհետեւ այն մեր ազգային մշակույթի ժառանգությունն է, եւ մենք պարտավոր ենք ուղղակի առիթը բաց չթողնել եւ ներկայացնել այն աշխարհին: Մենք շատ ասելիք ունենք խոհարարական աշխարհում, եւ սա եւս մեկ առիթ է, որպեսզի զարկ տանք ոչ միայն մեր խոհանոցի զարգացմանը, այլ նաեւ ընդհանուր ռեստորանային մշակույթին: Այս ամենն իր հետ կբերի նաեւ մեր տնտեսության զարգացմանը, զբոսաշրջության ակտվացմանը եւ ընդհանրապես` մեր խոհանցի նկատմամբ վերաբերմունքի փոփոխությանը, որն արդեն սկսվել է փոխվել դրական առումով: Մենք հնարավորություն կունենանք համաշխարհային խոհարարական ասպարեզում մեր թափուր տեղը զբաղեցնելու, ինչը շատ կարեւոր է: Այնպես որ, շնորհավորում եմ բոլորիս: Սա երույթ է, որն ուղղակի պետք է ողջունվի եւ շատ կուզենամ, որ մարդիկ, ովքեր հնարավորություն, միջոցներ ունեն եւ հետաքրքրվում են մեր մշակութային ժառանգության ներկայացմամբ արտերկրում, սատարեն մեզ այս գործում»:

Մանրամասները դիտե՛ք

IRAVUNK..com-ի տեսանյութում.