Սուրիկ Խաչատրյանը չի կարող լինել իր նկատմամբ մահափորձի հեղինակը (Video)

1in.am-ը գրում է. «Հանրապետական կուսակցությունը զբաղվում է բոլոր հանրապետականների խնդիրներով և հարցերով: Իսկ ինչը գտնվում է իրավական դաշտում, դրանով պետք է զբաղվեն իրավապահները»,- «Առաջին լրատվական»-ի հետ զրույցում ասաց Հանրապետական խմբակցության ղեկավար Վահրամ Բաղդասարյանը՝ պատասխանելով մեր այն հարցին, թե արդյոք ժամանակը չէ՞, որ ՀՀԿ-ն լրջորեն մտածի Սյունիքի մարզպետ Սուրիկ Խաչատրյանի մասին, քանի որ վերջինիս և իր ընտանիքի շուրջ քրեական մթնոլորտը գնալով ահագնանում է:

Հիշեցնենք, որ մայիսի 20-ին Սյունիքում Ս. Խաչատրյանի մեքենայի վրա կրակել են: Իսկ մայիսի 2-ին նրա որդու՝ Տիգրան Խաչատրյանի մասնակցությամբ Սյունիքի Սըդղի գյոլ վայրում ծեծկռտուք է տեղի ունեցել, որի արդյունքում վնասվել է գորիսեցիներից մեկի աչքը, և նա զրկվել է տեսողությունից:

Վ. Բաղդասարյանը չհամաձայնեց այն դիտարկման հետ, թե Խաչատրյանների ընտանիքի շուրջ քրեական մթնոլորտը թեժանում է: Նա ասաց, թե իրավապահները պետք է մանրակրկտորեն ուսումնասիրեն ինչպես նախորդ բոլոր դեպքերը, այնպես էլ վերջինը՝ Սուրիկ Խաչատրյանի մեքենայի ուղղությամբ արձակված կրակոցները:

«Իրավապահները դրան գնահատական կտան, հայտարարություն կանեն, որից հետո եթե Հանրապետականը զգա, որ Սուրիկ Խաչատրյանը որևէ խնդիր ունի, որևէ առնչություն ունի՝ կքննարկենք: Սուրիկ Խաչատրյանն այսօր Սյունիքի մարզպետն է, և նրա աշխատանքի վերաբերյալ ՀՀԿ-ն որևէ դժգոհություն չունի: Ընդհակառակը՝ նա իր աշխատանքը կատարում է շատ պարկեշտ և լավ»,- ասաց Բաղդասարյանը:

ՀՀԿ խմբակցության ղեկավարը չհամաձայնեց նաև այն դիտարկման հետ, թե հանրության մոտ Սուրիկ Խաչատրյանի կերպարն այնքան բացասական է, որ մարդիկ նույնիսկ մտածում են, թե նա ինքն է իր նկատմամբ «մահափորձի» հեղինակը. չէ՞ որ մեքենայի վրա արձակված բազմաթիվ կրակոցների արդյունքում որևէ մեկը չի վնասվել: «Ես ցավում եմ, որ հանրությունը նմանատիպ կարծիք ունի, համենայնդեպս՝ Սուրիկ Խաչատրյանը չի կարող նման ձևով վարվել ինքն իր նկատմամբ»,- եզրափակեց Վ. Բաղդասարյանը: