«Կլանային համակարգը ուղղակի մեռնում է, բառի բուն իմաստով՝ ոչնչանում են».Լեւոն Շիրինյան

Քրիստոնեա-դեմոկրատական կուսակցության (ՀՔԴԿ) նախագահ, քաղաքագետ Լևոն Շիրինյանը, Fnews.am-ի զրույցում անդրադառնալով առաջիկա արտահերթ խորհրդարանական ընտրությունների հնարավոր զարգացումներին եւ քաղաքական ուժերի վերադասավորումներին, նախ նկատեց.

-Առաջիկա ընտրությունները անց են կացվելու արդարության մթնոլորտում՝ իրավապահ մարմինները աշխատելու են, քրեական տարրեր չեն լինելու, օլիգարխիան սսկված է լինելու։ Գուցե լինեն եզակի ինչ-որ դեպքեր, բայց ոչ ավելին։
Անձամբ մենք՝ մեր քաղաքական թիմը, անընդհատ պրոցեսը քաղաքականացնելու եւ գաղափարայնացնելու ենք, չենք թողնելու՝ հանկարծ ռազբորկաների վերածվի։
Ինչ վերաբերում է քաղաքական վերադասավորումներին՝ եկեք ինձ զանգեք քարոզարշավի չորրորդ-հինգերորդ օրը, որպեսզի ավելի հստակ ասեմ՝ ով ինչ շանսեր ունի, հիմա մի փոքր կդժվարանամ։

-Համենայնդեպս ներկա պահի դրությամբ ինչպե՞ս եք գնահատում օրինակ ՀՀԿ-ի, ԲՀԿ-ի, ՕԵԿ-ի շանսերը:

-Ասեմ. ՕԵԿ-ի շանսերը այս պահին 0.1 տոկոս է, ՀՀԿ-ն 1 տոկոսից ներքեւ է, ԲՀԿ-ն անորոշ է ինձ համար, որովհետեւ կառույցի տրամաբանությունը առայժմ չեմ հասկանում։ Եթե ռեյտինգայինով ակտիվ եղան՝ իշխանությունը թողեց, դա ուրիշ բան է, մնացածը դժվարանում եմ ասել։

- Իսկ ի՞նչ կասեք «Մենք» դաշինքի մասին։

-«Մենք» դաշինքը՝ 1.1 տոկոս ոչ ավել։ Ես կարող եմ մեր մասին էլ ասել, որովհետեւ հանդիպում եմ ժողովրդի հետ։ Ճիշտ է՝ մենք ուշ մտանք, բայց շշմելու բան է, որովհետեւ ժողովուրդը կարծես քրիստոնեական արժեքները որոնում էր , եւ ակնհայտ է, որ մեր շանսերը բավականին բարձր են։

-Պարոն Շիրինյան, մարդաորսի միտումներ կա՞ն, թե ոչ ընտրական կամպանիայի ընթացքում։

-Հիմա բոլորը խլուրդի գործ են անում։ Բայց ես մի բան կարող եմ ասել, օրինակ այն օրը Արարատի մարզում եմ եղել, եւ ապշեցնող տպավորություններով եմ հետ եկել։ Ժողովուրդը, կներեք արտահայտությանս համար, բայց բացարձակ թքած ունի նախկին իշխանիկների վրա։ Ես պարզապես զարմացա, թե ինչպես էին ինձ դիմավորում, այն դեպքում, որ ես ոչ Արարատի մարզից եմ, ոչ էլ՝ որեւէ կլանի անդամ եմ։ Կլանային համակարգը ուղղակի մեռնում է, բառի բուն իմաստով՝ ոչնչանում են։

-Ընտրական գործընթացին մասնակցող քաղաքական ուժերից՝ ո՞վ ինչ ռեալ հաղթաթուղթ ունի։

-Ակնհայտ է մի բան․ ՔՊ-ն կկազմի մեծամասնություն, բայց ոչ բացարձակ։ Նիկոլ Փաշինյան էլ հանդես կգա, որպես ոչ միայն ՔՊ ղեակավար, այլ հեղափոխության առաջնորդ։ Հետեւապես Փաշինյանը ուզի չուզի ցենտրիստական քաղաքականություն պետք է վարի: Դա նշանակում է մենք կունենանք բալանսավորված խորհրդարան։

- Եվ վերջում, հետաքրքիր է նաեւ Ձեր տեսլականը Արցախի հարցի շուրջ։

-Եթե Դուք նկատել եք Արցախի հարցով ես առհասարակ չեմ խոսում բավականին երկար ժամանակ, որովհետեւ վտանգ չեմ տեսնում, դրա համար էլ չեմ խոսում։ Արցախի հարցը լուծված է վաղուց։

Զրույցը՝ Անի Ավագյանի