Կկայանա Կարա-Մուրզայի առաջին բազմաձայն պատարագի պրեմիերան

Կամերային երաժշտության ազգային կենտրոնը հայ երաժշտասեր հանրությանը ներկայացնելու է Քրիստափոր Կարա-Մուրզայի առաջին բազմաձայն պատարագի պրեմիերան: Պատարագի ձեռագրերը համարվում էին կորած, բայց նյույորքաբնակ մեր հայրենակից Գրիքոր Փիթեջյանի շնորհիվ ձեռագրերը գտնվել են Ռոմանոս Մելիքյանի արխիվում և խմբագրվել են հենց պարոն Փիթեջյանի կողմից: Պարոն Փիթեջյանի հավաստմամբ մինչ այս փուլին հասնելը 10 տարի է պահանջվել. «Վերջին երեք տարիները Հայաստան գալով կնոջս հետ գնում էինք Չարենցի արխվային գրադարանը: Հետաքրքրվում էի, պրպտում էի: Ես գիտեի, որ շատ երգեր կան, որոնց կողքն աստղանիշ է դրված, իսկ ծանոթագրության մեջ գրված է, որ դրանք կորածներն են: Գրադարանում ես նոտաներին նայելով շատ բաներ էի հայտնաբերում: Եվ մի օր էլ ծրարից հանեցի ու տեսա երկու էջեր, որոնք նրա ծրագրերն էին: Ուրախությանս չափ չկար` մենք գիտեինք, որ նա մշակել է հայկական հոգևորական երգեր, շարականներ: Ես խնդրեցի պարոն Թոփիկյանին և նա համաձայնեց 111 տարի հետո նորից Էջմիածնի հողի վրա կատարել բազմաձայն հոգևոր այդ երգերը»: Բացի հոգևոր շարականներից գտնվել են նաև մի քանի տասնյակ խմբագրային մշակումներ, որոնցից որոշները նույնպես կատարվելու են: Համերգը կկայանա նոյեմբերի 1-ին 19:00-ին Կոմիտասի անվան կամերային երաժշտական տանը: