Իշխանություն, թե՞ խանություն.մեկնաբանում են փորձագետները

Սեպտեմբերի 18-ին կայանալիք ՏԻՄ ընտրություններում, ԵԿՄ վարչության նախագահ, գեներալ Աանվել Գրիգորյանը իր որդուն՝ Կարեն Գրիգորյանին, նորից քաղաքապետ դարձնելուց  բացի,  հաշվարկել է իր մյուս որդուն ու  փեսային էլ «կարգել» ավագանու անդամ:

Դիտարկմանը, թե Էջմիածնում մանվելգրիգորյանական իշխանություն է, ԳԽ նախկին պատգամավոր Ազատ Արշակյանը այնքան էլ համամիտ չէ: Նրա որակմամբ Էջմիածնում ոչ թե իշխանություն, այլ խանություն է հաստատված: «Այնտեղ իշխանություն չի, իշխանություն տերմինը, իշխան բառը բովանդակություն ունի, դա քաղաքակրթության հետ է կապված, իսկ այ խանությունն արդեն ես հասկանում եմ: Ի՞նչ է կատարվում խանությունում…խանությունում ընտրություն տեղի չի ունենում, այնտեղ լինում է նը-շա-նա-կում… տեսնենք խանն իր ազգականներից ո՞ւմ կնշանակի իրեն ծառա քաղաքում. քաղաքացիներին տեր, իրեն` ծառա»,-Fnews.am-ի հետ զրույցում նկատեց Ազատ Արշակյանը: Նրա դիտարկմամբ` երևույթի դեմ պայքարելու համար Հայաստանում պետք է լինի ժողովրդավարական իշխանություն: «Եթե ժողովրդավարությունը հաղթի, ուրեմն ժողովուրդը կնշանակի իր ծառային, այսինքն կընտրի այն մարդուն, ով կծառայի իրեն: Իսկ առայժմ ժողովուրդն այդ հնարավորությունից զրկված է` այդ թվում նաև Էջմիածնում…»,-նկատեց ԳԽ նախկին պատգամավորը:

«Ազատ դեմոկրատներ» կուսակցության փոխնախագահ Անուշ Սեդրակյանն էլ համոզված է` պայքարի ճանապարհը միանշանակ համակարգային է: Նա հորդորում է ոչ թե անձնավորել խնդիրը, այլ տեսնել դրա հիմնապատճառները: «Ցայսօր մենք միայն անձեր քննարկելով ենք զբաղված, փոխանակ քննարկենք համակարգը… մենք պետք է քննարկենք այն, թե ինչու են Հայաստանի իշխանությանը նման մարդիկ անհրաժեշտ… Մանվել Գրիգորյանը, Սուրիկ Խաչատրյանն ու շատ-շատերը…»,-ասում է Անուշ Սեդրակյանը: