Ի՞նչ «պոստ» է զբաղեցնելու Դավիթ Արսենիչը

ԱՍԵԿՈՍԵ

Այս խորագրի ներքո հրապարակված նյութի իրականությունը չի երաշխավորվում 

Չնայած նրան, որ նախկին գյուղնախարար, ՀՅԴ Բյուրոյի անդամ Դավիթ Լոքյանը լրատվամիջոցներից մեկի միջոցով արդեն իսկ հասցրեց արձագանքել իր՝ փոխվարչապետ դառնալու հնարավորությանը, ասելով թե. «Այդպիսի բան հնարավոր չէ, ՀՅԴ-ն կառավարության մաս չի կազմելու, ես չեմ լինելու փոխվարչապետ», սակայն, այս օրերին շարունակվում են ակտիվ խոսակցություններ պտտվել այն մասին, որ միեւնույնն է Լոքյանը աչքը չի կտրում ՀՀ կառավարության շենքից: Խոսում են, որ նա ամեն գնով փորձում է վերադառնալ իր հին ու բարի ժամանակներին՝ երբ պորտֆել ուներ, ուր գնում էր ոտքի տակ խալի էր փռած, հետն էլ մարդը ում ոնց ուզում էր՝ աջ ու ձախ «պրախոդ» էր տալիս պետական գերատեսչություններում: Ճիշտ է, այսօր էլ նախկին գյուղնախարարի որդին՝ կրտսեր Լոքյանը իրեն վատ չի զգում վարչապետ Արգամիչի «թեւի» տակ, սակայն ասում ենմ, որ դա Լոքյանների նման պորտֆելասեր գերդաստանի համար հավանաբար եղածը՝ քիչ է...

Երեւի դա է հենց պատճառը, որ նախկին պաշտոնյան ամեն գնով փորձում է վերադառնալ «նորին գերազանցություն» հայրենի կառավարություն:
Ինչեւէ, պտտվող ասեկոսեների համաձայն, օրերս դարձյալ առանձնազրույց են ունեցել վարչապետ Արգամիչն ու երդվյալ դաշնակցական Դավիթ Լոքյանը, ով Արգամիչի մոտ անկեղծացել է ու ասել, որ իհարկե ամեն ինչ էլ կա՝ ապրուստ միջոց, լավ կյանք, բայց դե փառքն ու պատիվը, պաշտոնը, մի ուրիշ բան ա… Վերջում էլ Լոքյանը հավելել է, թե.«Ախր ոնց կաշխատեինք՝ Արգամիչս ու ես»: Նույն լուրերի համաձայն, խոսում են, որ Արգամիչը այնուամենայնիվ չի հիասթափեցրել Լոքյանի սպասումները, եւ նրան հուսադրել է ասելով, թե առաջիկայում դեռ շատ ջրեր են զուլալվելու, եւ որ մոտ ապագայում չի բացառվում, Լոքյանն իսկապես իր պատվավոր տեղը զբաղեցնի հայրենի կառավարությունում: