ՀՀ-ում քրեածին իրավիճակը մտահոգիչ է, եւ «կանտրոլ» անելու լուրջ անհրաժեշտություն է նկատվում

Հայտնի է, որ հունվարի 17-ին Երեւանում Նաիրի Զարյան փողոց-Ազատության պողոտա հատվածում Opel մակնիշի 35 ZL 140 համարանիշի ավտոմեքենայից դուրս են եկել մի խումբ երիտասարդներ, հարձակվել Mercedes մակնիշի 34 ՍF 304 համարանիշի ավտոմեքենայի վրա, հարվածներ տեղացել, կոտրել ապակիները, որից հետո վրա հասած մի երիտասարդ ատրճանակով կրակոց է արձակել հեռացող Mercedes-ի ուղղությամբ:

Լավ, էս ի՞նչ բեսպրեդել է. մեկը կասի, ինչու պետք է այս լակոտներն անկաշկանդ, օրը ցերեկով շրջեն ատրճանակով, մահակներով, եւ անասնաբար հարձակվեն մարդկանց վրա, եւ դեռ մի բան էլ կրակոց արձակեն՝ հեռացող մեքենայի հետեւից: 
Փաստորեն այս դեպքում, եթե Մերսեդես մակնիշի ավտոմեքենայի վարորդին չհաջողվեր փախնել դեպքի վայրից, գազազած ամբոխը նրան առնվազն հիմա հոշոտած կլիներ... 
Բա ասում էինք.սեր ու համերաշխությո՞ւն…

Հ. Գ Իսկ ավելի լուրջ.այս անկառավարելի ու լպիրշ լակոտների «գյամերը քաշելու » համար, հայրենի իրավապահները րոպե առաջ պետք է կանխարգելիչ միջոցառումներ իրականացնեն. ընդ որում ոչ թե «գալոչկա» դնելու, այլ կոնկրետ արդյունավետություն ապահովելու համար:

Իսկ կարող ա՞ .էս խելագարված ամբոխն էլ ա «արխային» ընկել որ գրավ ա էլի՝ կտան դուրս կգան… ոնց որ եղավ զինակոչիկների վրա հարձակում գործած դուսպրծուկներից մեկի դեպքում:

Հայրենի իշխանավորնե՛ր, եւ պատկան կառույցի ղեկավարնե՛ր, ապահովեք ՀՀ քաղաքացիներիս անվտանգությունը , եւ թույլ մի տվեք, որ կրիմինալ երեւույթները կրկին վխտան փողոցներում…

Հատկապես վերջին ժամանակներս, ՀՀ-ում տեղի ունեցած մի շարք բռնարարքները. երբ մի դեպքում հանրության աչքի առաջ հարձակվում են զինակոչիկների վրա՝ ձեռք բարձրացնում, հայհոյում, հաշիվներ պարզում, իսկ մյուս դեպքում՝ մի սիգնալ տալու համար մահակներով հարձակվում ու ջարդուփշուր են անում մարդու գույքը, կրակում նրա հետեւից, իսկ ահա մեկ այլ իրավիճակում՝ թքում են իր աշխատանքը կատարող փաստաբանի մեքեանայի վրա, վնասում նրա գույքն ու դարձյալ իրավիճակից դուրս գալու լուսանցք գտնում, ապա ակամայից տպավորություն է ստեղծվում, որ մի որոշակի զանգվածի նկրտումները՝ այնուամենայնիվ բանդիտական Հայաստան կերտելն է, ոչ ավելին:

Լավ կլիներ, այս օրերին  փողոցի աղբն ու բուտկաները  մաքրելուն զուգահեռ , փողոցներից մաքրվեին նաեւ  մահակավոր աղբակույտերը, քանզի այս բանդան անհամատեղելի է Հայաստանի Հանրապետության քաղաքացիների հետ:

Այս ընթացքում, եթե մի քանի այլասերվածի կարողանային պատժել, ընդ որում, շատ ավելի խիստ ձեւով, եւ այս գործում միասնական լինեին բոլոր պատկան կառույցները, ապա անպատժելիությունը չէր ծնի առավել լկտի ու հոռի երեւույթներ: 
Փաստ է, որ այսուհետ, հասարակությունը չի ցանկանում հանդուրժել բեսպրեդելի ու նրանց շրջապատի արտոնյալ և անպատիժ լակոտների գործունեությունը: ՀՀ-ի քրեածին իրավիճակը իսկապես մտահոգիչ է, եւ «կանտրոլ» անելու լուրջ անհրաժեշտություն է նկատվում:

ԳԱՅԱՆԵ    ԶԱՐԳԱՐՅԱՆ