«Հայաստանի ձայն նախագծում ես հաղթանակի վրա չեմ կենտրոնանում». Եվա Ռիվաս

«Հայաստանի ձայն» նախագծի առաջին համերգը կայացել է, իսկ մարզիչները կատարել են իրենց ընտրությունները: Առաջին տպավորությունների, սպասումների մասին Life.panorama.am-ը զրուցել է նախագծի մարզիչ, երգչուհի Եվա Ռիվասի հետ:

-Հայաստանի ձայն նախագծի շրջանակում արդեն առաջին համերգը կայացել է ի՞նչ տպավորություններ ունեք:

-Տպավորություններն ու զգացողությունները միայն դրական են: Չնայած դրան, տխրեցնող պահեր նույնպես եղան: Պետք է ասեմ, որ տխուր պահերը կապված են այն հանգամանքի հետ, որ շատ տաղանդավոր մարդանց ելույթի ժամանակ չշրջվեցինք: Կարծում եմ, ինչպես իմ, այնպես էլ մյուս մարզիչների վրա երկու գործոն է ազդում: Մեկը հոգեբանական գործոնն է: Մեզնից յուրաքանչյուրը սպասում է ավելի լավ համարի, ավելի լավ կատարողի: Մտածում ենք՝ ահա հաջորդ համարն ավելի լավն է լինելու: Իրականում, ես կարծում եմ, որ դա այդքան էլ օբյեկտիվ չէ, որովհետև, երբ մասնակիցը դուրս է գալիս բեմ, հուզվում է: Մենք ցանկանում ենք լսել այնպիսի կատարում, ինչպիսին ձայնագրվածն է: Կարծես, թե առաջին համերգի օրը դա էինք փնտրում: Եվ ահա հենց այդ պատճառով, շատ մասնակիցների ելույթի ժամանակ չշրջվեցինք: Դա, իհարկե, տխրեցնում է: Թե մենք ինչու այս կամ այն տաղանդավոր մասնակցի կատարման ժամանակ չենք շրջվում, պատճառներից մեկն այն է, որ մեզնից յուրաքանչյուրն իր համար պատկերացնում է կատարողի մի պատկեր: Ասենք, ես կարող եմ շատ լավ ձայնային տվյալներով մասնակցի լսել , բայց ինքս ինձ համար պարզապես չպատկերացնեմ, որ կարող եմ աշխատել իր հետ: Միգուցե ինձ հետաքրքիր չէ իր սխալները շտկել, հետաքրքիր չէ նրան սովորեցնել: Անձամբ ես այդ հարցում կողմնորոշվում եմ զուտ ինտուիցիայի մակարդակում: Եթե իմ հոգին դա ցանկանում է և իմ ձեռքը ձգվում է դեպի կոճակը, ապա ես դա անում եմ: Եվ այդպես դա տեղի ունեցավ նախորդ շաբաթ: Իմ ընտրած մասնակիցների կատարումներում անհարթություններ կային, բայց ես գտնում եմ, որ դրանք կարող եմ շտկել շատ կարճ ժամանակում՝ դարձնելով նրանց արտիստներ, և ինձ հետաքրքիր կլինի իրենց հետ աշխատելը: Եվ ինչպես ես գուշակեցի, իրենք էներգետիկայով շատ նման են ինձ և կարծում եմ՝ արդյունավետ կաշխատենք:

-Այդ օրը ելույթ ունեցած մասնակիցների ելույթներն ինչպե՞ս կգնահատեք, ովքե՞ր առավել շատ տպավորություն թողեցին ձեզ վրա:

-Իմ ընտրած մասնակիցների մասին ես կլռեմ, իրենք ինձ շատ են դուր գալիս: Այնպես է ստացվել, որ նրանք ոչ միայն երգիչներ են, այլև արտաքնապես շատ գեղեցիկ են: Լինում են դեպքեր, երբ արտիստը մատուցում է երգը, բայց արտաքնապես հետաքրքիր չի լինում: Պետք է մեկում լինեն բոլոր հատկանիշները՝ արտիստիզմ, ձայն, արտաքին տվյալներ, հայացք: Մինչ այժմ իմ ընտրած մասնակիցների մոտ ես դա տեսնում եմ: Ես շրջվել եմ նաև Լիլիթի ու Մերիի կատարման ժամանակ: Երկուսն էլ իրենց գործի գիտակ են, շատ պրոֆեսիոնալ, սկզբունքորեն իրենց ինչ-որ բան սովորեցնել պետք չէ, իրենք անձամբ արդեն շատ լավ գիտեն ինչ անել, ինչպես պահել բեմում: Նրանք ինձ չընտրեցին, բայց ես չեմ տխրել, կարող եմ ասել, որ շրջվել եմ, որովհետև հիանալի կատարումներ էին: Աղջիկները կայացած արտիստներ են, ես նախընտրում եմ աշխատել այն մարդկանց հետ, ովքեր ինչ-որ հարցերում օգնության կարիք ունեն: Ցանկանում եմ աջակցել, որպեսզի դառնան արտիստ:

Բացի այդ, ես չեմ կարողանում մոռանալ Գագիկ Ասլանյանի կատարումը: Ես մի քանի անգամ համացանցով դիտում եմ նրա կատարումը և չեմ կարողանում ինձ ներել, նույնիսկ չգիտեմ ինչի համար: Եթե զուտ մասնագիտական տեսանկյունից եմ նայում, ես չեմ շրջվել, որովհետև կտարումը հաջող չէր: Հետո ինչպես ես իմացա, նա փորձերի ժամանակ շատ ավելի լավ էր երգել: Ամեն դեպքում ես ինձ չեմ կարողանում ներել, որ չեմ շրջվել նրա կատարման ժամանակ:

Մասնակիցներից մեկին էլ կառանձնացնեի, ում կատարման ժամանակ ոչ ոք չշրջվեց: Երևի թե նա երգի ընտրությունը ճիշտ չէր կատարել և նա չկարողացավ իր ունակությունները լիարժեք ցուցադրել: Բայց երբ նա ավարտեց և հետո այլ երգի մի փոքր հատված երգեց, հասկացա, որ նա այլ մակարդակի արտիստ է: Իսկապես ցավում եմ: Ահա նրանք այն մասնակիցներն են, ովքեր ինձ վրա լուրջ տպավորություն են թողել, ես պարբերաբար մտածում եմ իրենց մասին: