Հարուստները ռեցեսիայի զոհ չեն դառնա. The Week

Հակառակ համաշխարհային ցնցումներին, գնաճին եւ արժեթղթերի անկմանը, հարուստները շարունակում են ծախսել: Աշխարհի խոշորագույն ապրանքանիշերից LVMH Moet Hennessy Louis Vuitton-ը երրորդ եռամսյակում գերազանցել է սպասելիքները՝ գրանցելով վաճառքի 19 տոկոս աճ, գրում է Bloomberg-ը։

Նայելով անցյալ շաբաթ LVMH-ի հրապարակած թվերին եւ կազմակերպության ղեկավարների մեկնաբանություններին՝ «կարելի է մտածել, որ աշխարհը աշխարհաքաղաքական ցնցումների, գնաճի ավելացման եւ արժեթղթերի շուկաների անկմանը չի բախվում», - նշում է The Week-ը:

LVMH-ի գլխավոր ֆինանսական տնօրեն Ժան-Ժակ Գիոնին ասել է, որ, հակառակ ռեցեսիայի մասին բոլոր խոսակցություններին, «ոչ ոք դեռ չի տեսել դա»: Շքեղ ապրանքների մանրածախ առեւտրով զբաղվողները պաշտպանված չեն համաշխարհային տնտեսական անկումից: Սակայն LVMH-ը պարզապես «շատ բարձր է սահմանել գալիք հաշվետու սեզոնի նշաձողը»:

Լյուքս դասի ապրանքանիշերն արդեն մեծ ակնկալիքներ ունեին, ասել է Քերոլ Ռայանը The Wall Street Journal-ին։ Անցյալ տարի արդյունաբերության վաճառքներն աճել են 33 տոկոսով՝ հասնելով ռեկորդային 285 միլիարդ դոլարի՝ պայմանավորված ֆինանսական ակտիվների արժեքի կտրուկ աճով։

Հակառակ ներկայիս տնտեսական անկմանը, ակնկալվում է, որ աշխարհում նոր միլիոնատերերի թիվը մինչեւ 2026 թվականը կաճի 40 տոկոսով, ընդ որում «Բրազիլիայում եւ Հնդկաստանում այն կկրկնապատկվի»: LVMH-ի նորաձևության և կաշվե իրերի բաժինը «ավելի քան հինգ անգամ ավելի մեծ է, քան երկու տասնամյակ առաջ»: Այս աճը թույլ է տվել ընկերության համահիմնադիր եւ գործադիր տնօրեն Բեռնար Առնոյին՝ առաջ անցնել Ջեֆ Բեզոսից՝ դառնալով աշխարհի երկրորդ ամենահարուստ մարդը:

Ամերիկացիներն ասում են, որ դժգոհ են տնտեսությունից, գրում է The Economist-ը։ «2021 թվականի հունիսից մինչեւ 2022 թվականի հունիսը Միչիգանի սպառողների ինդեքսն ընկել է ավելի քան 40 տոկոսով, նույնիսկ այն դեպքում, երբ սպառողական ծախսերն աճել են 9.3-ով»: Մինչդեռ բարձր գները ազդում են «սպառողների տրամադրությունների վրա»:

«Ըստ LendingClub-ի վերջին զեկույցի, օգոստոսի դրությամբ ամերիկացիների 60 տոկոսն ապրում է աշխատավարձից աշխատավարձ»: