«Ես ապրել եմ ուզում»... Նախկին զինծառայող կինը հայցում է Վիգեն Սարգսյանի օգնությունը.PHOTO,VIDEO

Վարդանուշ Կիրակոսյանը նախկին զինծառայող է: Նա ավելի քան 15 տարի ծառայել է Էջմիածնի հակաօդային հատուկ ստորաբաժանումում, որի հետևանքով ստացել է կրցքագեղծի քաղցկեղ՝ «աջ կրծքագեղձի նորագոյացություն» c-r ախտորոշմամբ: Նրա կրծքագեղձը հեռացրել են: Այն ժամանակ կինը ստացել էր քիմիաթերապիայի 8 կուրս, սակայն դեղորայքային քիմիաթերապիային զուգահեռ նրան անհրաժեշտ է եղել նաև համակամարմին՝ «Herceptin» դեղամիջոցի կիրառումը: ՈՒ քանի որ դեղորայքը բավականին թանկ արժեր, և նա հնարավորություն չուներ այն ձեռք բերել, ուստի դիմել էր Պաշտպանության նախարարություն, որտեղ նրա խնդրին չէին արձագանքել: Մինչդեռ Վարդանու Կիրակոսյանի պահանջը օրինաչափ էր, քանի որ նա ուներ փաստաթղթեր, որոնք վկայում էին, որ կինը հիվանդությունը ձեռք է բերել իր ծառայության ընթացքում ու հենց դրա պատճառով (թթվածնի պակասի և ճառագայթման հետևանքով):

2016-ի օգոստոսին Fnews.am-ն անդրադարձել էր Վարդանուշ Կիրակոսյանի խնդրին: Որից հետո Պաշտպանության նախարարությունը արձագանքել էր մեր հրապարակմանը, եւ տիկին վերջապես հաջողվել էր հանդիպել նախկին նախարար Սեյրան Օհանյանին: Նրա որոշմամբ էլ կնոջ համար ձեռք էր բերվել Herceptin» դեղամիջոցը: Սակայն 1 բուժման փուլով նախատեսված 12 սրվակի փոխարեն՝ Վարդանուշ Կիրակոսյանը ստացել էր 8 սրվակ:

«Կա բժշկի տեղեկանք, որով խորհուրդ է տվում օգտագործել ևս 440մլ, 4 սրվակ, որն արժե ավելի քան 600 000 դրամ…»,-ասում է մեր զրուցակիցն ու հավելում, որ հաջորդ ներարկումը ապրիլի 12-ին է, որից հետո արդեն կհայտնվի անելանելի վիճակում: Ամեն ներարկման համար Վարդանուշ Կիրակոսյանը վճարում է 12 000 դրամ, չնայած նրան, որ Պաշտպանության նախարարը, նրա ներկայությամբ, հանձնարարել էր դեղորայքի գնի հետ նախարարության ֆինասավորման մեջ ներառել նաև բուժման ծախսերը: Բայց կինը համակերպվել է դրան: Այս պահին նրա համար կարևորը դեղորայքի ձեռքբերումն է: Նա հասկանում է՝ խնդիրը նախարարի կարգով լուծելու անհրաժեշտություն ունի: «Այդ դեղը դրական ազդեցություն է գործում իմ օրգանիզմի վրա և ես դրա ազդեցությունն զգում եմ: Ես մեկ տարի ութ ամիս պայքարել եմ, մինչև նախկին նախարարի մոտ եմ մտել: Հիմա այդքան ժամանակ չունեմ, քանի որ ընդամենը 21 օր ունեմ մինչև հաջորդ դեղորայքի ներարկման ժամանակը…»,-ասում է Վարդանուշ Կիրակոսյանն ու ցույց տալիս բոլոր այն փաստաթղերը, որոնք սրբորեն հավաքել, ու որոնց մեջ ինչ որ տեղ տեսնում է նաև իր փրկությունը: «Ես շնորհակալություն եմ հայտնում նախկին նախարարին ինձ կյանք նվիրելու համար, սակայն նոր նախարարը՝ Վիգեն Սարգսյանը, կարծում եմ տեղյակ չէ իմ խնդրի մասին: Եթ նա իմանար, որ ամեն ինչ օրենքի շրջանակում է, և պաշտպանության նախարարությունն է ֆինանսավորում դեղորայքի ձեռքբերումը, որից իմ կյանքն է կախված, նա չէր մերժի…»,-ասում է Վարդանուշ Կիրակոսյանն արցունքի միջից, հավատալով, որ մի օր այլևս չի լացի:

Նկատենք նաև, որ Վարդանուշ Կիրակոսայնն ապրում է միայնակ և գոյատևում 60 000 դրամ թոշակով: Նա իր բուժումների համար նույնիսկ վարկ է վերցրել՝ հույսով, որ կապաքինվի ու կկարողանա վերադարձնել այն: Նա իրականում ֆինանսական օգնության կարիք ունի, սակայն պաշտպանության նախարարությունից ոչ թե փող, այլ դեղ է խնդրում, որից կախված է իր կյանքը: Կինը նաև նշում է, որ լյարդի վրա ևս առկա են փոքրիկ բարորակ գոյացություններ, որոնք բժիշկնեի գնահատմամբ, կարող են դարձյալ վերածվել c-r գոյացության: Նրա մոտ առկա նաև ձախ կրծքի քաղցկեղի վտանգ: Վարդանուշ Կիրակոսյանի խոսքով՝ ախտորոշման նպատակով, արդեն 2 անգամ օրգանի ծակում են արել (պունկցիա): Մասանգետները չեն բացառել, որ այտեղ ևս չարորակ քաղցկեղի վտանգ կարող է լինել: Այնպես, որ ամբողջական բուժում այլևս անխուսափելի է: «Ես ապրել եմ ուզում»,-ասում է կինը:

Մանրամասները՝ տեսանյութում: