«Երեւան բրենդ» ծրագրի հերթական նախագիծն է իրականացվել

Երեւանի քաղաքապետի տեղակալ Արամ Սուքիասյանը մասնակցել է Երեւանի բրենդի կոնցեպտի եւ վիզուալ հիմքերի շնորհանդես-ասուլիսին, որը «Երեւան բրենդ» ծրագրի՝ մայրաքաղաքի բրենդի հեռանկարային զարգացմանն ուղղված նախագծերից հերթականն է։ Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե հայաստանցի ու արտերկրից ժամանած մասնագետներից բաղկացած աշխատանքային խումբը ներկայացրել է կատարած բազմաթիվ հետազոտությունների արդյունքում դուրս բերված եւ մշակված Երեւանի տարածքային բրենդի, ինչպես նաեւ Երեւան քաղաքի վիզուալ ոճի միասնական կոնցեպտները, որոնք հիմք են ծառայելու քաղաքի ձեւավորման հետագա քայլերի համար։ Ծրագիրը միտված է աշխարհում Երեւանը հավաք խորհրդանիշով ճանաչելի դարձնելուն։ Ամիսների աշխատանքի արդյունքում արդեն հստակեցրել են մոտեցումները, մշակել են բրենդի տառատեսակը։ «Գաղափարական իմաստն արդեն հստակ է։ Իհարկե, կա դեռ շատ աշխատանք՝ ամբողջացնելու արդյունքը։ Բազմաթիվ մարդիկ են մասնակցում պրոցեսին, մասնագետներից բացի, հետաքրքրված են նաեւ պարզապես քաղաքացիներ։ Սոցցանցերում եւս քննարկվում է, բազմազան կարծիքներ ենք լսում, ինչը շատ արդյունավետ է։ Կարծում եմ՝ կստանանք այն, ինչը հոգեհարազատ կլինի, համոզիչ կլինի մեծամասնության համար»,- նշել է Երեւանի քաղաքապետի տեղակալ Արամ Սուքիասյանը։ Աշխատանքային խմբի մասնակից բրիտանացի փորձագետ Ալեքսանդր Գրանդն ընդգծել է, որ նախնական այս արդյունքը 125 կարծիքներից զտված ռացիոնալ-օգտակարն է։ «Երեւանը հին քաղաք է, Հռոմից էլ հին, բայց ամենակարեւորը ոչ թե հնությունն է, այլ հարատեւությունը։ Այստեղ ծնվել է մարդկությունը, քաղաքակրթությունը, այստեղ ամեն ինչ արվում է խորությամբ. հենց դա էլ բնորոշում է Երեւանի էությունը»,- նշել է բրիտանացի փորձագետը։ «Երեւան բրենդ» ծրագրի հաջորդ նախագիծը աշխատանքային խումբը նախատեսել է ներկայացնել մեկ ամսվա ընթացքում։