«Էլ գող փիսո, էլ քաչալ շուն...»

Եվ այսպես, վերջապես եկավ հոկտեմբերի 26-ը՝ Հայաստանի կոմպոզիտորների եւ երաժշտագետների միության կամ, ինչպես գրված է օրենքում, միավորման (ՀԿԵՄ)արտահերթ համագումարի օրը։  Հիշեցնենք, որ անցած կիրակի էլ կայացել էր ՀԳՄ համագումարը, որի օրակարգային միակ հարցը միության նախագահի ընտրությունն էր։ Այն ավարտվեց մի քանի ժամում, եւ ՀԳՄ նախագահ ընտրվեց միության քարտուղար, ինչպես նաեւ նախագահի պաշտոնակատար Էդվարդ Միլիտոնյանը։ Այսինքն, եղավ այն, ինչ պետք է լիներ նման գրողական միջավայրում։ Իսկ ահա  ՀԿԵՄ համագումարը հավակնում է դառնալ սերիալ, առնվազն երկսերիանոց կինոնկար։ Բանն այն, որ երեկ Արամ Խաչատրյան համերգասրահում Հայաստանի սիմֆոնիկ նվագախմբի ելույթով մեկնարկած համագումարը շարունակվելու է այսօր, բայց արդեն ՀԿԵՄ շենքում։ Եվ պարզ չէ՝ կավարտվի՞ այսօր, թե՞ ոչ։ Ավելորդ չենք համարում հիշեցնել, որ արդեն քանի ամիս միության նախագահի գործունեությունը քննադատող ելույթներ, հրապարակումներ են հնչում, որոշ կոմպոզիտորներ միության նախագահին, վարչությանը  համարում են ոչ լեգիտիմ, տարբեր որակումներ են տալիս, պահանջում են Դիլիջանի կոմպոզիտորների տունը անվանակոչել Էդվարդ Միրզոյանի անունով, որպեսզի այն «գայլի բաժին» չդառնա։ Անցնելով համագումարին՝ նշենք, որ մեծ դժվարությամբ ընտրվեց նախագահության կազմ ելույթ ունեցան ինչպես ընդդիմադիր կոմպոզիտորները, այնպես էլ միության նախագահ Ռոբերտ Ամիրխանյանը, հնչեցին փոխադարձ մեղադրանքներ՝ էլ գող փիսո, էլ քաչալ շուն... Նշենք, որ համագումարը սկսվելուց առաջ ներկաներին բաժանված հայտարարությունում պահանջվում էր օրակարգ ներառել հետեւյալ հարցերը՝ ՀԿԵՄ ՀԿ-ի 2009-2010թթ., 2011-2012թթ. յուրաքանչյուր տարվա եւ 01.01.2013թ.-01.10.2013թ. ժամանակահատվածի գործունեության եւ գույքի օգտագործման նախագահի հաշվետվության հաստատումը, ՀԿԵՄ ՀԿ-ի 2009-2010թթ., 2011-2012թթ. յուրաքանչյուր տարվա եւ 01.01.2013թ.-01.10.2013թ. ժամանակահատվածի վերստուգիչ հանձնաժողովի՝ ՀԿԵՄ գործունեության, հաշվեկշռի, գույքի պահպանման եւ այլ ամփոփ տվյալների ստուգման արդյունքների վերաբերյալ հաշվետվության հաստատում, ՀԿԵՄ նախագահի՝ գաղտնի քվեարկությամբ ընտրություններ, նախագահի առաջարկությամբ՝ ՀԿԵՄ փոխնախագահի եւ պատասխանատու քարտուղարի թեկնածությունների հաստատում, ՀԿԵՄ վարչության եւ վերստուգիչ հանձնաժողովի թվաքանակի որոշում եւ ընտրություններ, ՀԿԵՄ անդամների ելույթներ, հայտարարություններ եւ առաջարկների քննարկում։ Այդ հայտարարությունը ստորագրել էին Մարգարիտ Ռուխկյանը, Արամ Սաթյանը, Լեւոն Չաուշյանը, Վահրամ Բաբայանը, Ստեփան Սուքիասյանը, Երվանդ Երկանյանը, Վարդան Աճեմյանը, Սուրեն Զաքարյանը եւ Մարտին Վարդազարյանը... Ամեն ինչ դեռ առջեւում է, ինչի մասին մանրամասներ կներկայացնենք համագումարի ավարտից հետո։

Ռ. ԹԱԹՈՅԱՆ