Դատարանը բավարարեց Սամվել Բաբայանի պաշտպանի միջնորդությունը. կարեւոր ապացույցը կտրամադրվի կողմին

ԼՂՀ ՊԲ նախկին հրամանատար Սամվել Բաբայանի, Սանասար Գաբրիելյանի եւ Արմեն Պողոսյանի վերաբերյալ քննվող քրեական գործի նյութերը ողջ ծավալով հասանելի կլինեն պաշտպանական կողմին։ Այսօր՝ նոյեմբերի 26–ին Երեւանի ընդհանուր իրավասության դատարանի դատավոր Մարինե Մելքոնյանը որոշում կայացրեց բավարարել Հրաչյա Մայիլյանի հեռախոսային խոսակցությունների գաղտնալսումների վերծանումները պաշտպանական կողմին տրամադրելու վերաբերյալ Սամվել Բաբայանի պաշտպան Արամ Ղլեչյանի միջնորդությունը։ Դատարանը միաժամանակ որոշեց Երեւան քաղաքի ընդհանուր իրավասության դատարանից պահանջել գաղտնալսումների վերաբերյալ բոլոր նյութերը։ Նշենք, որ առաջին ատյանի դատարանը Սամվել Բաբայանի եւ մյուսների գործով մեղադրական դատավճռի հիմքում դրել էր օպերատիվ հետախուզական միջոցառման շրջանակներում ձեռք բերված ապացույցներ:

Մեկ այլ գործի շրջանակներում ԱԱԾ-ն որոշել էր գաղտնալսել «Իգլա» զենիթահրթիռային համակարգի խողովակն ԱԱԾ-ին հանձնած Հրաչյա Մայիլյանին, եւ, ըստ գործի նյութերի՝ Բաբայանի եւ մյուսների վերաբերյալ գործը հենց այդ գաղտնալսումների արդյունքում է բացահայտվել: Բաբայանի պաշտպան Ավետիս Քալաշյանն առաջին ատյանի դատարանին միջնորդել էր Մայիլյանին առնչվող գործի շրջանակներում օպերատիվ հետախուզական միջոցառում իրականացնելու թույլտվության նյութերը պահանջել եւ հետազոտել` դրանց օրինականությունը ստուգելու համար: Դատարանը, նախագահությամբ դատավոր Արշակ Վարդանյանի, միջնորդությունը բավարարել էր ու պահանջել նյութերը, սակայն Երեւան քաղաքի ընդհանուր իրավասության դատարանից գրություն էր ուղարկվել այն մասին, որ այդ նյութերը դեռեւս սահմանված կարգով գաղտնազերծված չեն, ու դրանք Բաբայանի գործը քննող դատարանին չէին տրամադրվել: 2018թ. հունիսի 15–ին Վճռաբեկ դատարանը դիրքորոշում էր հայտնել, որ Հրաչյա Մայիլյանի հեռախոսային խոսակցությունների գաղտնալսման արդյունքների թույլատրելիությունը ստորադաս դատարանների կողմից չի ենթարկվել պատշաճ գնահատման, ուստի նշված ապացույցը չէր կարող դրվել վերջնական դատական ակտի հիմքում: Դատարանը միաժամանակ փաստել էր, որ ստորադաս դատարանների կողմից չի իրականացվել գործի լրիվ, օբյեկտիվ եւ բազմակողմանի քննություն՝ ամբաստանյալ Սամվել Բաբայանին եւ մյուսներին մեղավոր ճանաչելու վերաբերյալ եզրահանգում անելու համար: