«Այսօր մեր երկրի ամենառաջատար շարժիչ ուժը, սոցիալական միավորը` կանայք են». Ազգագրագետ

Այսօր աշխարհը նշում է Կանանց միջազգային օրը (IWD), որի սկզբնական անվանումը Աշխատավոր կանանց միջազգային օրն էր: Ամեն տարի այս օրը` մարտի 8-ին, տարբեր տարածաշրջաններում տոնակատարությունների հիմքում ընկած է կանանց նկատմամբ հարգանքը՝ տնտեսական, քաղաքական և հասարակական ոլորտներում արձանագրած նրանց ձեռքբերումները։

Հայ կնոջ դերակատարման, արժեւորման, յուրահատկության եւ այլ հարցերի շուրջ էլ, NEWSMEDIA.am-ը զրուցել է ազգագրագետ ՀՐԱՆՈՒՇ ԽԱՌԱՏՅԱՆԻ հետ, ով նախ եւ առաջ իր խոսքում նկատեց.

-Ես անկեղծ ասած՝ չէի առանձնացնի հայ կնոջը: Աշխարհում ընթացող գործընթացները կան. ե՛ւ էվոլյուցիոն ե՛ւ քաղաքական, աշխարհը շատ է փոխվել՝ սեռերի դերակատարության առումով: Այն իրավիճակը, որն այսօր կա՝ զգալի չափով նաեւ խորհրդային շրջանում կնոջ նկատմամբ դրսեւորված քաղաքականությունից էր գալիս: Այսինքն ե՛ւ կրթությունը, ե՛ւ պրոֆեսիոնալ գործունեությամբ զբաղվելը, ե՛ւ սեռերի վարչաքաղաքական դերակատարությունների բարձրացման նկատմամբ որոշակի ձեւավորված եւ իրականացված որոշումները՝ զգալի չափով փոխել են հասարակության վերաբերմունքը կանանց նկատմամբ: Ինչպես նաեւ փոխվել է. կանանց սեփական ինքնագնահատականը՝իրենց իսկ նկատմամբ:

Այսօր կնոջ նկատմամբ ՝ հատուկ բացասական վերաբերմունքի քաղաքականություն չկա, եւ դա է պատճառը, որ կանայքի իրենք իրենց ճանապարհը գտնում են իրենց ընտանիքի, հասարակական միջավայրի եւ իրենց մտավոր կարողությունների ինքնուրույն ծրագրավորման շնորհիվ: Ես գտնում եմ, որ այսօր ՀՀ-ի ամենառաջատար շարժիչ ուժը, սոցիալական միավորը՝ կանայք են: Ճիշտ է, իշխանությունը դեռեւս մի քիչ պասիվ է գնահատելու կանանց ռեալ հնարավորությունները. Բայց ակնհայտ է, որ կանայք շատ ավելի մեծ ջանքեր են գործադրում՝ իրենց զարգացման եւ իրենց պրոֆեսիոնալ գործունեությունը առաջ տանելու ուղղությամբ:
Բուհերում` իմ ունեցած փորձը ցույցը է տալիս, որ աղջիկները այսօր ավելի պատրաստ են իրենց վրա աշխատել, այսինքն նրանք գիտակցում են, որ իրենց համար կրթությունը, գիտելիքը եւ կամքը իրենցից ավելի շատ է պահանջվում հանրային միջավայրում, քան տղամարդկանցից: Եւ նրանք շատ ավելի հետեւողական են այդ հարցում, քան տղաները:

Հայ կանայք պատվով տանում են իրենց վրա դրված բեռը` բոլոր իմաստներով

-Տիիկին Խառատյան, շատ հաճախ տեսնում ենք, որ տղամարդիկ նեղվում են կանանց ղեկավարության ներքո աշխատելուց, Դուք կիսում ե՞ք այդ տեսակետը:

-Անշուշտ, սա գործատուների եւ աշխատանքի կազմակերպման մեջ մեծ դեր ունի: Մյուս կողմից՝ կանայք իրենց սեփական աշխատանքի միջոցով լուրջ մրցակցության մեջ են մտնում տղամարդկանց հետ: Կանայք շատ լավ տիրապետում են իրենց պաշտպանելու մեխանիզմներին. նրանք իրենց պաշտպանելու համար ընտրում են ավելի ընդունելի, իրավական , օրինապահ, հասարակական կարծրատիպեր, քան տղամարդիկ:
Եւ դա պատահական չէ. այո, կանանցից պահանջվում է ավելի մեծ զսպվածություն, ավելի իրավական կարգ, ավելի բարոյական` հանրային հասարական արժեքների տիրույթում տեղավորելու կարողություն:

-Տիկին Խառատյան, օգտվելով առիթից ապրիլի 7-ի կապակցությամբ Շնորհավորում ենք Ձեզ ՝որպես հայ կնոջ հավաքական կերպար: Եվ ակնկալում Ձեր խոսքը, հորդորը՝ հայ կնոջը:

-Ես այսպես ասեմ. ես ուրախ եմ մեր կանանց համար: Ես կարծում եմ, որ հայ կանայք պատվով տանում են իրենց վրա դրված բեռը` բոլոր իմաստներով: Շնորհավորում եմ մեր հասարակությանը, մեր հայ տղամարդկանց, որ ունեն հայ կնոջ նման առաքինի կերպարներ: