«Այս կրակոցները հենց այնպես, միամիտ տեղի չեն ունենում, դրանք ունեն նախապատմություններ».Գագիկ Համբարյան

«Հայաստանում անպատժելիության մթնոլորտը գնալով ավելի է խորանում, և զենքով հարցեր լուծելու, վրեժխնդրության դրսևորումները կարծես թե  դարձել են սովորական: Ընդ որում, տարբեր քրեական հեղինակությունների միջև զինված մարտերն ընթանում են անարգել՝ Հայաստանի քաղաքներում, անգամ՝ մայրաքաղաքի կենտրոնում: Երեկ՝ օրը ցերեկով, Երևանում՝ Վերնիսաժի տարածքում, ՀՀ-ում Լեհաստանի և Ճապոնիայի դեսպանատների, իշխող ՀՀԿ-ի ու ՀՅԴ-ի գրասենյակների հարևանությամբ, կրակում էին:Հայտնի քաղաքագետ Գագիկ Համբարյանը, Fnews.am-ի  հետ զրույցում անդրադառնալով կրիմինալի աշխուժացմանը նկատեց.

-ՀՀ-ում նման հանցագործություններ կանխելը շատ հեշտ է, մենք շատ փոքր երկիր ենք, եւ ոստիկանության լավ աշխատանքի պարագայում շատ արագ կարելի է ոչ թե բացահայտել, այլ կանխել նմանատիպ հանցագործությունը:

Գաղտնիք չէ, որ ոստիկանությունը ունի իր ներկայացուցիչները բոլոր քաղաքաներում, թաղամասերում, գյուղերում, եւ միանշանակ կարող են իմանալ, թե որտեղ է իրավիճակը պայթունավտանգ, որտեղ են նախնական բախումներ տեղի ունեցել, որոնք հետագայում վեր են ածվում կրակոցների եւ ողբերգությունների: Խնդիրը նրանում է, որ ներկայիս ոստիկանությունը պրոֆիլակտիկ քայլեր չի կատարում հանցագործությունները կանխելու համար: Արդյունքում ունենք այն ինչ ունենք:
Տեսեք, հասարակ օրինակ, Սասնա ծռերի դատավարության ժամանակ ոստիկանապետին վիրավորեցին, անվանեցին լակոտ եւ դա որեւէ հետեւնք չունեցավ: Ես չեմ ասում թող այդ անձին տանեին մորթազերծ անեին, սպանեին, չէ, էդ անձին կարող էր ընդամենը նույն ոստիկանապետը դատի տար, բայց չէ…իսկ անպատժելիությունը ծնում է նոր հանցանքներ:
Ցավոք, մեզ մոտ ժողովրդավարությունը խառնում են ամենաթողության հետ, մտածում են՝ եթե թավշյա հեղափոխություն է եղել, ուրեմն ով ինչ ուզենա կարող է անել, ով ում հասցեին ինչ ուզենա կարող է ասել ու անպատիժ մնալ: Չէ, չկա նման բան ժողովուրդ, ոչ մի երկրում նման բան չկա: Անգամ ԱՄՆ-ում, որը համարվում ժողովրդավարության հայր, Դուք երբեք նման բան չեք տեսնի:
Էլի եմ կրկնում, որ կրիմինալի ակտիվացումը ոստիկանության թույլ աշխատանքի հետեւանքն է: Ես համոզված եմ, որ այս կրակոցները հենց այնպես, միամիտ տեղի չեն ունենում, դրանք ունեն նախապատմություններ, մինչ այդ հանդիպումներ են տեղի ունենում տարբեր խմբավորումների միջեւ, որի մասին հանրությունը տեղյակ չի լինում, բայց ոստիկանությունը, համոզված եմ, որ ունի այդ ինֆորմացիան եւ եթե ժամանակին կանխի ոչ մի նման բան չի լինի:
Ավելին ասեմ, ինձ թվում է, որ գործող իշխանություններին այս ամենաթողության վիճակը շատ ձեռնտու է, հասարակության ուշադրությունը անընդհատ շեղվում է սոցիա-լտնտեսական խնդիրներից, բայց այդպես չի կարելի:
Կրկնում եմ, ոստիկանությունը պետք է փոխի իր աշխատելաոճը, հակառակ դեպքում նմանատիպ դեպքերը հղի կլինեն  ավելի ծանր հետեւանքներով:

-Պարոն Համբարյան, էական ի՞նչ տարբերություններ եք տեսնում ներկա եւ նախկին ոստիկանական համակարգի միջեւ:

-Ցավոք ոչինչ չի փոխվել, ոչինչ...Պարզապես պարոն Գասպարյանի մոտ ելույթները   լավ էին ստացվում, հիշեք իր ելույթները: Թե չէ եթե ընդհանուր վերցնենք. որեւէ փոփոխություն հավատացեք ոստիկանության համակարգում տեղի չի ունեցել: Ինչպես նախկին իշխանությունների օրոք կային թաղայիննների, գողականների միջեւ ռազբորականնեը, այդպես էլ նույն ոգով հիմա դրանք շարունակվում են:

ՆՈՆԱ   ԱԴԱՄՅԱՆ