Արտո Թունջբոյաջյան. «Կյանքն է ոգեշնչում ինձ աշխատել, իսկ երաժշտությունը՝ կյանքիս ձայնն է»…

Արտո Թունջբոյաջյանը ամենաինքնատիպ աշխարահռչակ երաժիշտներից է ավանգարդ ֆոլկ ոճում, ով հայտնի է նաև «Armenian Navy Band» խմբի ղեկավար, հայտնի «Night Ark» ամերիկահայ ջազ-քառյակի հիմնադիր, երաժշտական «ՍերԱրտ» նախագծի համահեղինակ Սերժ Թանկյանի հետ համատեղ: Ջազ երաժշտության, ֆոկլյորի երկրպագուները քաջատեղյակ են պերկուսիոն գործիքների առաջնակարգ կատարող Արտո Թունջբոյաջյանին, ում անունը նաև ճանաչվեց world music ուղղության երկրպագուների շրջանում: Այս անգամ մեր ընթերցողներին ենք ներկայացնում Forums.am-ը զրույցը տաղանդավոր կոմպոզիտոր, երգիչ Արտո Թունջբոյաջյանի հետ:

- Ո՞րտեղ է գտնվում այս պահին Արտո Թունջբոյաջյանը, և ի՞նչ նոր ծրագրեր ունեք առաջիկայում:

- Այս պահին գտնվում եմ Լոս Անջելեսում, խումբ ունենք, որի հետ աշխատում ենք, իսկ շուտով պետք է ունենամ մենահամերգ հայ երիտասարդ ջազ երաժիշտների հետ համատեղ: Իհարկե սպասվում են նաեւ նորանոր համերգներ, նախագծեր, որոնք պետք է կյանքի կոչվեն նոյեմբերի սկզբին՝ Հայաստանում:

- Ի՞նչն է Ձեզ ոգեշնչում ստեղծագործական կյանքում:

- Կյանքն է ոգեշնչում ինձ աշխատել, իսկ երաժշտությունը՝ կյանքիս ձայնն է, գիտեք այդպիսի հստակ բանաձև չունեմ, բայց գիտեմ, որ կյանքի ամեն ուրախությունից, ամեն լավ բանից կարող եմ ոգեշնչվել, պետք է միշտ աշխատել, ստեղծագործել և կայանալ:

-Արտո, լինու՞մ են պահեր, երբ ցանկանում ես լինել մենակ, հեռու ամեն ինչից. միայն քո մտքերի ու զգացմունքների հետ:

-Այդքան բազում մարդկանց մեջ միշտ մենակ եմ. առանձնացած իմ մտքերով, իմ աշխարհով. ընդհանրապես շատ դուրս գալ չեմ սիրում, շատ մտքեր դուրս չեմ հանում, բայց գիտեք միշտ մտածել եմ մի գաղափարի շուրջ, որը կարող է դիտարկվել նաև նպատակ. այն է, որ Հայաստանում այնպիսի մի վայր լինի, որտեղ մարդիկ կկարողանան արտահայտել իրենց մտքերը, ներաշխարհը… Կկարողանան կիսվել միմյանց հետ, օգնել, աջակցել ու ոգեշնչել միմյանց, որի արդյունքում ազգը կմիանա, կհամախմբվի:

-Ըստ Կարնեգիի` «Երջանկությունը կախված չէ այն բանից, թե ով ես դու և ինչ ունես, այն կախված է միայն նրանից, թե ինչ ես դու մտածում դրա մասին»:

-Ինձ համար երջանկությունն առողջությունն է, վստահություն, երբ կարողանում ես մտքերովդ կիսվել, երբ գաղափարով ես, կարողանում ես առողջ մտածել ու դատել, երբ մարդը մտածում է մարդու մասին: Նաև ազգիս ու մարդկության ուրախությունն է. ուզում եմ ազգս միանա, միահամուռ լինի, հարգանք ունենա միմյանց նկատմամբ ու նաև բնության հանդեպ, որովհետև բնությունը մեր մարմինն է, երբ բնության հետ խաղ ես անում, ուրեմն քո մարմնի հետ ես խաղ անում: ԿՅԱՆՔՈՒՄ ՈՉ ՄԻ ԲԱՆ

ՊԵՏՔ ՉԷ ՍՏԻՊՈՂԱԲԱՐ ԱՆԵԼ, ՀՈՒՄ ԿՍՏԱՑՎԻ…

- Կհիշե՞ք Ձեզ համար մի թանկ խորհուրդ:

-Եղբորս խորհուրդն էր, որ ինձ համար միշտ թանկ է. ոչ մի բան կյանքում պետք չէ ստիպողաբար անել` հում կլինի, պետք է համբերել, և ամեն բան ինքն իր ժամանակին կլինի, պետք է միշտ ուշադիր լինել:

- Արտո, կկիսվե̉ք Ձեր երազանքներով և նպատակներով:

- Միշտ նպատակ եմ ունեցել, որ Հայաստանն ունենա արվեստագետների կենտրոն, ազգս միշտ համախմբված լինի, ինքն իրեն չխաբի. վնաս չտա, հայրենասեր լինի, կեղտոտ բաները չխանգարեն իրենց, ու մարդն իր հացը վերցնի լավ ձևով, ոչ թե խաբելով: Եթե անցյալում չեն արել, թող ապագայում անեն, վստահություն, երազանքներ ու պատկերացումներ ունենան:

- Ձեր կարծիքով, երիտասարդ երգիչները Հայաստանում ապագա ունե՞ն:

-Մենք ունենք շատ տաղանդավոր երիտասարդ երգիչներ և մենք պետք է օգնենք և պաշտպանենք իրենց մեր կյանքի լավ փորձով: Եվ անշուշտ նրանք ունեն ապագա, եթե ասելիք ունեն:

Եվ իրոք, հանդիսանալով երիտասարդ ներկայացուցիչներից մեկը, մի պահ մտածեցի, որ իրավ միայն ազգի համախմբվածության դեպքում կարելի է առաջ շարժվել և ապագա կերտել:

Forums.am–ը շնորհակալություն է հայտնում Արտո Թունջբոյաջյանին անկեղծ զրույցի համար և մաղթում նրան նորանոր ստեղծագործական հաջողություններ:

Զրույցը՝ Դիանա Կարապետյանի