Ապարանի քաղաքապետը՝գողականների հետ ունեցած կապերի ու ոստիկանության ստուգումների մասին

Տեւական ժամանակ է, ինչ լուրեր են շրջանառվում այն մասին, որ ՀՀ Ոստիկանության 6 –րդ վարչությունը ստուգումներ է իրականացնում ինչպես Ապարանի քաղաքապետարանում, այնպես էլ Ապարանում գործող ,  համայնքապետի հիմնադրած «Գնթունիք» ընկերությունում:

Ըստ շրջանառվող լուրերի, ոստիկանության համապատասխան վարչությունը քաղաքապետարանում փորձել է գտնել պաշտոնական դիրքի չարաշահման եւ յուրացման հատկանիշներ պարունակող հանցակազմի տարրեր:
Նույն լուրերի համաձայն, 6-րդ վարչությունը տեւական ստուգումների արդյունքում այդպես էլ որեւէ փաստ չի հայտնաբերել, եւ ինչպես ապարանցիներն են ասում, հեռացել են առանց աշխարհացունց հայտնաբերումների:

Որքանով են վերը նշված լուրերը համապատասխանում իրականությանը, եւ թե արդյո՞ք այս թնջուկը կապ ունի այն խոսակցությունների հետ, որ Ապարանի քաղաքապետը մտերիմ հարաբերություններ ունի քրեական ու գողական աշխարհի դեմքերի հետ, փորձեցինք հետաքրքրվել անձամբ Ապարանի համայնքապետ ԿԱՐԵՆ ԵՂԻԱԶԱՐՅԱՆԻՑ, ով մեզ հետ զրույցում ասաց հետեւյալը.

-Բայց ինչ ա պատահել.ի՞նչ խնդիր կա: Թող ստուգեն. ես դրա մեջ որեւէ վատ բան չեմ տեսնում, քանի որ աշխատել ենք ու աշխատում ենք ի բարօրություն մեր ժողովրդի՝ պարզ ու թափանցիկ ձեւով: Որքան ուզում են թող ստուգեն՝ իհարկե օրենքի շրջանակներում:

-Պարոն Եղիազարյան, իսկ ճի՞շտ է, որ դուք շատ ընկերներ ունեք, ովքեր գողական աշխարհի կարկառուն դեմքեր են, եւ ասում են, որ նրանց հետ ակտիվ շփումների մեջ եք՝բոլոր ժամանակներում:

-Ես շատ ու շատ ընկերներ ունեմ ամենատարբեր ոլորոտներում, այդ թվում նաեւ Ձեր ասած գողական աշխարհում: Հետո ի՞նչ. ես իմ ընկերներից երբեք չեմ հրաժարվում. դավաճանությունն ինձ համար չէ: