Աբովյանում տեղի ունեցավ սպանված գնդապետ Արթուր Վանոյանի հոգեհանգստյան արարողությունը (տեսանյութ)

Աբովյան քաղաքի 10-րդ փողոցը մարդաշատ էր, հենց այդ փողոցում՝ իր տանը տեղի ունեցավ գնդապետ Արթուր Վանոյանի հոգեհանգստյան արարողությունը, ով սպանվել էր հուլիսի 17-ին ՀՀ ոստիկանության պարեկապահակային ծառայության գնդի տարածքում:  

Գնդապետ Արթուր Վանոյանի հոգեհանգստյան արարողությանը մասնակցում էին մանկության ընկերները, հարազատները, ծառայակիցները, ենթականերն ու պարզապես նրա մասին լսած ու նրան ճանաչող մարդիկ: 

Tert.am-ի հետ զրույցում առանց տեսախցիկի, թե տեսախցիկի առկայության դեպքում հոգեհանգստին մասնակից քաղաքացիները ցավով էին խոսում տեղի ունեցածի մասին, և հայտնում, որ պետությունն ու իրենք արժանավոր քաղաքացու և լավ ընկերոջ են կորցրել: 

«Ազնիվ մարդ էր:Արթուր Վանոյանն իմ տղայի դպրոցական ընկերն էր, միասին են դպրոցն ավարտել, հիմա էլ մեր խնամին էր:  Իմ թոռնիկը նշանվել է Արթուր Վանոյանի տղայի հետ և  օգոստոսի 19-ին պետք է նրա տղայի՝ Ժորայի ու մեր աղջկա հարսանիքը »,-Tert.am-ի հետ զրույցում ասաց Ջիվան Հարությունյանը:

Արթուր Վանոյանի հոր մանկության ընկերն էլ Tert.am-ի հետ զրույցում ասաց, որ գնդապետը հասակ է առել իր աչքի առաջ. «Իմ երեխաների հետ հասակակիցներ էին, դպրոցում էլ միասին են սովորել: Տեղի ունեցածը շատ ցավալի է»: 

Հոգեհանգստի մասնակից Արթուր Վանոյանի ընկերը պատմելու շատ բան ունի, հուշերն էլ ուրախ են, սակայն գնդապետի մասին անցյալով խոսելը դժվար է. «Արթուրին մոռանալ չի լինի»։

«Մարդն իր գործն է կատարել, այդտեղ էլ իր օջախն է եղել, բայց զենքով գալիս մտնում են իր օջախ.... Դա ճի՞շտ բան է, սխալ է, բացարձակ: Երբեք չէի ցանկանա, որ մեր երեխեն նման մահ ունենար»,-ասաց Արթուր Վանոյանի բարեկամը:

Տեսախցիկների բացակայության դեպքում խոսել ցանկացողները շատ են, սակայն, հայտնում են, որ տեղի ունեցած զինված հարձակման մանրամասներին ծանոթ չեն, բայց, միևնույն է, այն իրենց համար անընդունելի է:

Գնդապետ Արթուր Վանոյանի հոգեհանգստյան արարողությանը մասնակցում էին մանկության ընկերները, հարազատները, ծառայակիցները, ոստիկանական համակարգի ներկայացուցիչներ, ենթականեր ու պարզապես նրա մասին լսած ու նրան ճանաչող մարդիկ:

Հիշեցնենք, որ երկու օր առաջ «Սասնա ծռեր» զինված խումբը մուտք էր գործել ՀՀ ոստիկանության պարեկապահակային ծառայության գնդի տարածք և մինչ օրս բռնության սպառնալիքով պատանդ են պահում են այնտեղ գտնվող արդեն չորս ոստիկաններին: Բանակցությունների արդյունքում պատանդներից երկուսն ազատ են արձակվել: 

Նույն օրը հրազենային վնասվածքից մահացել էր 1967 թվականին ծնված գնդապետ Արթուր Վանոյանը: