ԱՄՆ արտագաղթած հայ դերասանների հիմնական մասն աշխատում է որպես մատուցող

1in.am-ը գրում է.Պրոդյուսեր, ԱՄՆ-ում բնակվող Արա Ղազարյանը օրերս Ֆեյսբուքի իր էջում գրել էր, որ 2009-ին «Էմիգրանտները» սերիալի համար քասթինգ անելիս երիտասարդ դերասանների ընտրության մեծ խնդիր ուներ: Նույն պատկերն էր նաև հաջորդ բոլոր նախագծերի ժամանակ: Մինչդեռ այժմ այնքան շատ են Հայաստանից վերջերս եկած երիտասարդ շնորհալի դերասանների դիմումները «Կտակով Թագուհին-2» սերիալի համար, որ չգիտի՝ ինչ անել: «Մի կողմից՝ լավ է, մյուս կողմից՝ սարսափելի է»,- գրել էր նա:

«Առաջին լրատվական»-ի հետ զրույցում նա նշեց, որ մարդիկ գալիս են Լոս Անջելես, իսկ դրա պատճառները պետք է որոնել և գտնել, սակայն ամեն մարդ ազատ է իր որոշման մեջ: Նրա խոսքով՝ դինամիկան աճել է, բավական է միայն Ֆեյսբուքով դիտել, և պատկերը պարզ կլինի, թե քանի հոգի են եկել:

Հարցին՝ արդյոք շա՞տ են սերիալները, ֆիլմերը, որտեղ դերասանները հնարավորություն ունեն ռեալիզացվելու, Արա Ղազարյանը նշեց, որ շատ քիչ են: Իսկ թե ինչ են անում այս կամ այն նախագծից կամ սերիալից դուրս մնացած դերասանները՝ պրոդյուսերը նշեց, որ սա նեղ անձնական հարց է, և դա իրենց որոշումն է, իրենց կյանքն է, ընդհանրապես չի ուզում որևէ մեկին դատել:

Անդրադառնալով դերասանների՝ ԱՄՆ-ում հաստատվելու խնդրին, նա նշեց, որ որպես պրոդյուսեր՝ իր համար մեծ թվով երիտասարդ դերասանների Լոս Անջելեսում հաստատվելը շատ լավ է, քանի որ ընտրության ավելի մեծ հնարավորություն է ունենում: «Մեկը եկել է մոր մոտ, մյուսը եկել է ընտանիքի վերամիավորման համար, հաջորդը եկել է ամուսնանալու, չորրորդը գուցե եկել է իր երազանքի երկիր, որ գուցե դառնա հոլիվուդյան աստղ»,- նկատեց Արա Ղազարյանը:

Նրա խոսքով՝ թե՛ հայ դերասանի, թե՛ հայ հաղորդավարի և թե՛ հայ լրագրողի համար, իհարկե, ռեալիզացման դաշտը շատ ավելի մեծ է Հայաստանում, քանի որ եթե Միացյալ Նահանգներ գալիս են 35 ու 50 տարեկանում և դեռ անգլերենի 10 տոկոսը չսովորած, ապա ի՞նչ դաշտի մասին է խոսքը, թեև նշեց, որ, այնուամենայնիվ, որոշ բացառություններ կան:

Իսկ դեպի Հոլիվուդ ճանապարհ հարթելը չափազանց բարդ է՝ սկսած լեզվի խնդրից, մինչև մի շարք այլ խնդիրներ:

մանրամասները` սկզբնաղբյուրում